Búginde Qazaqstanda 24 bala shuǵyl túrde búırek aýystyrý operatsııasyn kútip otyr
ASTANA. QazAqparat - Qazirgi kezde Qazaqstanda 24 bala shuǵyl túrde búırek aýystyrý operatsııasyn kútip otyr. Bul týraly búgin Aqordada Medıtsına qyzmetkerleri kúni qarsańynda QR Memlekettik hatshysy Gúlshara Ábdiqalyqovamen kezdesý aldynda «Ana men bala» UǴO Búırek ortalyǵynyń jetekshisi Sholpan Altynova málim etti.
«Jalpy Qazaqstanda alǵash ret balanyń búıregi 1997 jyly A.Syzǵanov atyndaǵy Ulttyq ǵylymı hırýrgııalyq ortalyǵynda almastyrylǵan bolatyn. Sodan keıin búırek almastyrý operatsııalary jasalyp turdy. Jyl saıyn sozylmaly búırek jetispeýshiligi naýqasyna shaldyqqan jetkinshekterdiń sany kóbeıip ketti. Olar shetelge barǵanymen tıisti nátıje bolmady. Osy máselelerdiń barlyǵyn eskerip, biz bir top mamandy medıtsınasy ozyq damyǵan elderge oqytýǵa jiberip, biliktiligin shyńdadyq. Osy oraıda 2012 jyly Ana men bala ortalyǵynda úsh jasar balaǵa búırek almastyrdyq. Osy baǵytta salmaǵy 10 keli baladan bastadyq. Sodan beri 24 balanyń búıregin aýystyrdyq. Bul turǵyda oń nátıje bar jáne qazirgi kezde osy balalar mektepte, joǵary oqý oryndarynda bilim alýda»,-dedi Sh. Altynova.
Osy oraıda ol 2014 jyly balalar transplantatsııasyn damytý maqsatynda baýyr aýystyrý operatsııalary bastalǵanyn eske salyp ótti. Búgingi ýaqytqa deıin eki balanyń baýyry aýystyrylǵan eken.
«Qazir Qazaqstanda 3 myńǵa jýyq naýqas búırek aýystyrý operatsııasyn kútip otyr. Sonyń ishinde 37 bala bar jáne onyń 24-i búginde shuǵyl túrde búırek aýystyrý operatsııasy tiziminde tur. Alaıda donor tapshylyǵy barsha álemde problema. Eresekterge qaraǵanda balalardyń ereksheligine toqtalsaq, olarǵa ata-analary donor bola alady. 24 balanyń 21-ine ata-analary donor bolsa, al úsh balaǵa máıitten búırek almastyrylady»,-dedi Búırek ortalyǵynyń jetekshisi.
