Búginde Qazaqstanda 100-den astam «Bolashaq» túlekteri jumys izdestirýde - Ǵanı Nyǵymetov

ASTANA. 25 qarasha. QazAqparat - Búginde Qazaqstanda 100-den astam «Bolashaq» túlekteri jumys izdestirýde. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde «Bolashaq» baǵdarlamasynyń 20 jyldyǵyna oraı ótken baspasóz máslıhatynda «Halyqaralyq baǵdarlamalar ortalyǵy» AQ Prezıdenti Ǵanı Nyǵymetov málim etti.

«Jumyssyz júrgen «Bolashaq» ıegerleriniń sany kóp degen pikirmen kelispeımin. Bizdegi málimet boıynsha tek 124 túlek qazirgi kezde jumys izdestirýde. Ortasha eseppen alǵanda jumys izdeýge úshten alty aıǵa deıin ýaqyt ketedi. Bul aıtarlyqtaı tsıkldi ári maýsymdy úderis. Bizdiń taraptan, «Bolashaq» baǵdarlamasy ákimshileri jaǵynan jas mamanǵa barynsha kómek kórsetilýde. Baǵdarlamanyń qalǵan túlekteri jumyspen qamtylǵan»,-dedi ol. Sonymen qatar «Bolashaq» stıpendııasynyń túlekteri qandaı jaǵdaılarda shetelde jumys isteýge qala alatyndyǵy jaıynda habarlady. «Ol respýblıkalyq komıssııa ruqsat bergen jaǵdaıda jáne tek Qazaqstan múddesine ókildik etken halyqaralyq uıymdarda ǵana jumys isteı alady», - dep toqtaldy Ǵ. Nyǵymetov. Atap aıtqanda, 20 jyl ishinde stıpendııa 10 myń 25 azamatqa bólindi. Sol on myń adamnyń 6 myń 15-i Qazaqstanǵa oralyp, qazirgi kezde ekonomıkamyzdyń barlyq salasynda qyzmet etýde. Qazirgi kezde 2,5 myńy álemniń 35 elindegi 200 ýnıversıtette oqyp jatyr. «Qalǵandary oqýǵa baǵyt alýda nemese jaqyn arada oqýǵa baratyn bolady»,-dedi ol.