Búginde elimizde apattyq úılerdiń kólemi 2,2 mıllıon sharshy metrdi quraıdy - S. Nokın
STANA. Shildeniń 14-i. QazAqparat /Rýslan Ǵabbasov/ - Búginde elimizde apattyq úılerdiń kólemi 2,2 mıllıon sharshy metrdi quraıdy.
Bul týraly búgin Astanada Qurylys isteri jáne turǵyn úı-kommýnaldyq sharýashylyq agenttiginiń tóraǵasy Serik Nokın málim etti.
«Súrilip tastaýǵa jatatyn apattyq úılerdiń kólemi búginde elimizde 2,2 mıllıon sharshy metrdi quraıdy. Bul máseleni zańdy túrde sheshý kerek. Atap aıtqanda, bıylǵy jyly turǵyn úı qatynastary zańnamasyna ózgerister engizildi», - dedi agenttik basshysy.
Onyń sózine qaraǵanda, ózgeristerge baılanysty apattyq úıdiń turǵyny úshin kezek anyqtalady. «Endi jergilikti atqarýshy organdarda osy azamattardy respýblıkalyq bıýdjet qarjysymen qatar jergilikti organdar salǵan jalǵa beriletin jáne basqa da turǵyn úılerdiń kezegine qoıýdy zańdy túrde sheshe alady»,- dedi S. Nokın.
