Búginde elimizde 4,3 mıllıon otbasy bar
ASTANA. Qazannyń 4-i. QazAqparat /Rýslan Ǵabbasov/ - Búginde elimizde 4,3 mıllıon otbasy bar. Bul týraly búgin Astanadaǵy «Qazaqstan qoǵamynyń damýy men ornaýyndaǵy otbasy tárbıesiniń róli» atty dóńgelek ústelde Bilim jáne ǵylym vıtse-mınıstri Serik Yrsalıev aıtty.
«10 jyl buryn Qazaqstanda 3,5 mıllıon otbasy boldy jáne otbasy quramy ortasha alǵanda 4 adamnan quralǵan edi. Al búginde 4,3 mıllıon otbasy bar. Alaıda, onyń quramyndaǵy adam sanynyń ortasha kórsetkishi 3,5-ke deıin tómendedi»,-dedi vıtse-mınıstr.
Qazaqstanda otbasyny qoldaýdyń júıesi qurylǵanyna toqtalǵan ol, zańnamalyq deńgeıde az qamtylǵan otbasylarǵa qoldaý kórsetilip, tıisti járdemaqylar tólenip jatqanyn aıtyp ótti. «Elimizde 5 mıllıonǵa jýyq bala bar, 2,5 mıllıony bilim berý úderisimen qamtylǵan. Ókinishke qaraı, búginde densaýlyǵyna baılanysty múmkindigi shekteýli 148 myń jetkinshek anyqtalyp otyr»,-dedi S. Yrsalıev.
Jetim balalar máselesine toqtalǵan vıtse-mınıstr, «42 myń jetim balalar bar jáne olardyń kóbi áleýmettik jetimder, ıaǵnı bul jasóspirimderdiń ata-analary tiri. Sondaı-aq 15 myń jetim balalar men ata-anasynyń qamqorlyǵynsyz qalǵan jetkinshekter tolyǵymen memelekettiń qamqorlyǵyna alyndy»,-dedi.
Onyń sózine qaraǵanda, Kámeletke tolmaǵandardy ýaqytsha oqshaýlaý, beıimdeý jáne saýyqtyrý ortalyqtary jyl saıyn otbasynda turmaıtyn 8-9 myń bala bar ekenin anyqtaıtyn kórinedi.
