Búginde búkil bir redaktsııany ustap otyrýdyń qajeti joq – Asqar Omarov

ASTANA. QazAqparat – Ózindik aqparattyq nemese kontenttik baǵyt qurý múmkindigi artyp keledi. Mundaı pikirdi QR Prezıdenti janyndaǵy ortalyq kommýnıkatsııalar qyzmetiniń dırektory Asqar Omarov aıtty, dep habarlaıdy QazAqparat tilshisi.

«Aqparattar aǵyny artqan kezde buqaralyq aqparat quraldary da kóbeıe túsedi. Ózindik aqparattyq nemese kontenttik baǵyt qurý múmkindigi artyp keledi. Búginde búkil bir redaktsııany ustap otyrýdyń qajeti joq. Óziń úshin qandaı da bir bos keńistik taýyp alyp, sol baǵytta jumys isteý qajet. Soǵan oraı aqparat aǵyny da arta túsedi. Eger 90-jyldardyń basynda qoldanýshy kúnine 20-30 habarlama alsa, búginde ol 2-3 myń aqparat alýy múmkin. Sondyqtan ol qatelesedi, kúmándi aqparattar da túse bastaıdy. Degenmen, erte me, kesh pe bul jaıt tutynýshynyń aqparatty tańdaı bastaýyna alyp keledi. Sol sebepti medıasaýat, aqparattyq gıgıena qalyptasady», - dedi Asqar Omarov І Ortalyq Azııa medıaforýmy barysynda.

Spıkerdiń atap ótýinshe, búginde Qazaqstanda jáne ózge de elderde joǵary oqý oryndarynda, orta bilim mekemelerinde medıasaýat páni engizilgen.

«Aýdıtorııa aqparat kóp bolǵan saıyn jalǵan aqparattardyń da kóptep shyǵa bastaıtynyn sezinedi jáne oǵan shynaıy túrde áreket jasaıdy. Pandemııa feıkpen kúresý qajettigin kórsetip berdi. Eger buǵan deıin feıkpen jáne kúmándi aqparatpen qalaı kúresemiz dep kelsek, pandemııa kezeńi feıkpen kúres mańyzdy ekenin kórsetti. Kúresip qana qoımaı, onyń aldyn alý qajettigin baıqatty», - dedi ol.