Búginde baspanaǵa zárý 7 740 jetim bala úı alatyndardyń tizimine engizilmegen - BǴM
ASTANA. QazAqparat - Búgin QR Bilim jáne ǵylym mınıstriniń orynbasary Esenǵazy Imanǵalıev keıbir jergilikti atqarýshy organdardy otbasylarda tárbıelenip jatqan jetim balalardy páter alýǵa esepke turǵyzý jumysyn qajetti deńgeıde júrgizbeıdi dep synǵa aldy. Ol mundaı pikirdi búgin ótken QR Úkimeti janyndaǵy kámeletke tolmaǵandar isi jáne olardyń quqyqtaryn qorǵaý jónindegi vedomstvoaralyq komıssııanyń kekzekti 14-otyrysy kezinde aıtty.
«Byltyr «Qazaqstan Respýblıkasynyń keıbir zańnamalyq aktilerine jetim balalar men ata-anasynyń qamqorlyǵynsyz qalǵan balalardyń turǵyn úıge quqyqtaryn qamtamasyz etý máseleleri boıynsha ózgerister men tolyqtyrýlar engizý týraly» QR zańynyń jáne birqatar normatıvtik aktilerdiń qabyldanýyna qaramastan, jergilikti atqarýshy organdar otbasylarda tárbıelenip jatqan jetim balalardy páter alýǵa esepke turǵyzý jumysyn qajetti deńgeıde júrgizbeı otyr. Búginde baspanaǵa zárý 7 740 jetim bala úı alatyn tizimge engizilmegen (Aqmola (522), Almaty (196), Shyǵys Qazaqstan (324), Qaraǵandy (210), Qostanaı (377), Pavlodar (149), Ońtústik Qazaqstan (185) oblystary)», - dedi ol.
Onyń aıtýynsha, bul baǵyttaǵy jumysty jandandyrý úshin zańdy ókilder, tárbıeshiler men balalar úıleriniń qyzmetkerleri arasynda turǵyn úı zańnamasy boıynsha aqparattyq-túsindirý jumystaryn júrgizý qajet.
