Búginde 68 myń stýdent jataqhana oryndarymen qamtamasyz etilgen
ASTANA. QazAqparat - Búginde Qazaqstandaǵy joǵary oqý oryndarynda 68 myńnan astam jataqhana oryndary bar. Bul týraly «QazAqparatqa» QR Bilim jáne ǵylym mınıstrligi baspasóz qyzmetinen habarlady.
«Qazirgi kezde 68 113 stýdent jataqhana oryndarymen qamtamasyz etilgen», - dep atap ótilgen mınıstrliktiń málimetinde.
Esterińizge sala keteıik, Memleket basshysynyń «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» úshinshi bastamasyn iske asyrý aıasynda jataqhanalar salý tetigin qarastyratyn tıisti zańnama qabyldandy. Atalǵan bastama turǵysynda 2022 jyldyń sońyna deıin stýdentterge arnap keminde 75 myń oryndyq jańa jataqhana salý tapsyrylǵan. Osyǵan oraı búgingi kúni jataqhana salý tetigi ázirlenýde.
Budan buryn habarlanǵandaı, qoǵam belsendileri stýdentterdiń jataqhanaǵa ornalasý protsesin baqylaıtyn bolady.
Bıylǵy maýsym aıynda «Qoǵamdyq baqylaý kartasy» jobasy aıasynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Arnaıy monıtorıngtik toptarynyń músheleri reıdtik sharalardy ótkizdi. Onyń barysynda stýdenttik jataqhanalarda bógde adamdardyń zańsyz ornalasýy boıynsha birqatar faktiler anyqtaldy. Sonymen birge, keıbir oqý oryndarynda bos oryndardyń joqtyǵy saldarynan, stýdentter páter jaldaýǵa májbúr. Jańa oqý jyly qarsańynda jataqhanaǵa ornalasýǵa nıetti adamdar sany artady. Osy oraıda stýdenttik jataqhanalarǵa bóten adamdardyń ornalasýyna jol bermeý maqsatynda, sondaı-aq oryndardy bólýdiń ádil protsesin qamtamasyz etý turǵysynda Agenttik pen qoǵam belsendileri tıisti sharalardy iske asyrmaq.
