Búgin júzdegen myń adam Internetsiz qalady
ASTANA. 9 shilde. QazAqparat - Federaldyq barlaý qyzmeti búgin kompıýterleri DNSChanger vırýsyn juqtyrǵan 300 myńnan astam qoldanýshynyń ǵalamtoryn óshirip tastamaq. Bul týraly Ýtro.rý habarlaıdy.
Vırýs braýzerdiń qyzmetin buzyp, qoldanýshy ashpaq bolǵan saıttan basqa saıtqa baǵyttap, onymen qoımaı, túrli aqparattardy, máselen nesıe kartalarynyń málimetterin urlap alady.
Osy vırýspen ýlanǵandardyń kópshiligi AQSh-ta. Olardyń sany shamamen 70 myńnan asty. Ekinshi orynda Italııa. Ondaǵy «aýyrǵan» kompıýterler sany AQSh-tikinen eki ese az. Odan keıin Úndistan, Ulybrıtanııa, Germanııa, Frantsııa, Qytaı, Ispanııa, Kanada jáne Avstralııa dep kete beredi. Kóptegen múıizi qaraǵaıdaı kompanııalardyń, bankterdiń, uıymdardyń saıttary osy aýrýǵa shaldyqqan. Olardyń ishinde NASA da bar.
Qarapaıym antıvırýstarmen emdeýge kelmeıtin óte qý DNSChanger vırýsy 2007 jyly paıda bolǵan edi. Al 2011 jyldyń qarashasynda álemdegi 500 myńnan astam kompıýterge osy vırýsty juqtyrǵan 6 estondyq haker ustalǵan bolatyn. 4 jyl ishinde bul alaıaqtar 14 mln. dollar paıda tapqan.
Sol kezde barlaý qyzmeti qoldanýshylar setten kenet shyǵyp ketpes úshin qylmyskerlerdiń ótirik serverlerin ýaqytsha serverlermen almastyrǵan bolatyn. Degenmen, búgin, ıaǵnı 9 shilde kúni sol ýaqytsha serverlerdiń ýaqyty bitedi. Sondyqtan atalmysh vırýsty juqtyryp, emdelmegen kompıýterler ǵalamtorǵa shyǵa almaıdy. Bul turǵyda, tek ǵalamtor arqyly jumys isteıtin alpaýyt kompanııalar búgin qyrýar qarajattarynan qaǵylady degen sóz. Alaıda, bul ınternetsiz ómir uzaqqa sozylmaıdy dep sendiredi quzyrly organdar.
