Búgin Jazǵy ýnıversıada oıyndary bastalady

Jazǵy ýnıversıada oıyndary 3-14 shilde aralyǵynda ótkiziledi. Oǵan álemniń 170 memleketinen sportshylar keledi dep josparlanyp otyr. Onda 5971 úmitker sporttyń 18 túrinen 222 medal jıyntyǵyn sarapqa salady. Jarysqa qatysýshylar fýtbol, basketbol, voleıbol, sý doby, sýda júzý, sýǵa sekirý, sporttyq gımnastıka, kórkem gımnastıka, dzıýdo, jeńil atletıka, ústel tennısi, jelkendi sport, regbı, nysana kózdeý, sadaqpen atý, tennıs, thekvondo, semserlesý sekildi sport túrlerinen baq synaıdy.

Jazǵy ýnıversıada oıyndarynyń ashylý saltanaty búgin «San Paolo» stadıonynda ótedi. Atalmysh stadıonnyń ashylǵanyna bıyl 60 jyl tolady. 1960 jylǵy jazǵy Olımpıadada onda birqatar oıyndar boldy.

Aıta keterligi, Italııa Jazǵy ýnıversıada oıyndaryn óz tarıhynda tórtinshi márte qabyldap otyr. Atalmysh dúbirli doda 1959 jáne 1970 jyldary Týrınde, 1975 jyly Rım qalasynda jalaýyn kóterdi. Al Qysqy ýnıversıada oıyndary bul memelkette alty márte ótken.

Stýdenttik sport sharasynyń tarıhy 1905 jyldan bastaý alady. Sol jyly AQSh-ta stýdentter arasynda halyqaralyq jarys ótkizildi. 1919 jyly stýdentter konfederatsııasy quryldy. Sol uıymnyń qoldaýymen 1923 jyly Frantsııa astanasy - Parıj qalasynda búkilálemdik ýnıversıtettik oıyndar bolyp ótti. Dúbirli doda 1957 jylǵa deıin dál sol ataýmen uıymdastyryldy. 1959 jyly qazirgi ataýyna ıe boldy. Sodan beri bıyl dúbirli dodada otyzynshy márte saıysqa qatysýshylardy qabyldaıtyn bolady.

Ýnıversıdaǵa qatysýshylarǵa qoıylatyn talaptar bar. Quramaǵa ilikken jastar sol eldiń azamaty bolýy tıis. Sondaı-aq, jasy 17-den tómen jáne 28-den joǵary bolmaýy talap etiledi. Basty talabynyń biri - joǵary oqý oryndarynyń stýdenti nemese ony bitirgenine bir jyldan aspaýy qajet.

Qazaqstan Jazǵy ýnıversıada oıyndaryna 1993 jyldan beri qatysyp keledi. 1993 jyly AQSh-tyń Býffalo qalasynda ótkizilgen jarysta bizdiń elimiz nebári 1 kúmis alyp, jalpy komandalyq esepte 31 oryndy mise tutty. Al 1995 jyly Japonııanyń Fýkýoka qalasynda 2 kúmispen 33 oryn aldy. Odan keıingi 1997 jylǵy Italııanyń Sıtsılııa, 1999 jylǵy Italııanyń Palma qalalarynda ótken dúbirli dodada qorjynymyz bos qaıtty. Al 2001 jyly Qytaı astanasy - Beıjiń qalasynda ótken bedeldi básekeden sportshylar elimizge 3 kúmispen oraldy. Jalpy komandalyq esepte 33 oryn buıyrdy. 2003 jyly Ońtústik Koreıanyń Tegý qalasyndaǵy jarysta bizdiń qorjynǵa alǵash ret altyn medal tústi jáne onyń sany ekeý boldy. Bul joly bizdiń sportshylar olardyń sanyn taǵy 4 kúmis medalmen tolyqtyrdy. Jalpy komandalyq esepte sportshylar 18 orynǵa kóterildi.

2005 jyly Túrkııanyń Izmır qalasyndaǵy dúbirli dodada barlyǵy 9 medal (1 altyn, 2 kúmis, 6 qola) alyp, álem elderiniń arasynda 26-orynǵa kóterildi. Bizdiń sportshylar úshin 2007 jyly Taıland astanasy - Bangkok qalasyndaǵy ýnıversıada oıyndary tabysty boldy. Onda 14 medal (5 altyn, 4 kúmis, 5 qola) alyp qaıtqan qazaqstandyq sportshylar 11 orynǵa jaıǵasty. Eki jyldan keıin Serbııa astanasy - Belgradta bolǵan bedeldi básekede bar-joǵy 7 medaldi (1 altyn, 2 kúmis, 4 qola) mise tutyp, 32-oryn aldy. Al 2011 jyly Qytaıdyń Shenchjen qalasyndaǵy ýnıversıadada jalpy komandalyq esepte 45 orynǵa quldılap, atalmysh jarystan 3 kúmis, 3 qola medalmen qaıtty.

2013 jyly Reseıdiń Qazan qalasyndaǵy dúbirli dodada barlyǵy 30 medal (3 altyn, 11 kúmis, 16 qola) alǵan sportshylar jalpy komandalyq esepte 19-orynǵa turaqtady. Ońtústik Koreıanyń Kvandjý qalasyndaǵy 2015 jylǵy dúbirli dodada altyn medal sanyn 6-ǵa jetkizgenimen qazaqstandyq sportshylar ol jaqtan nebári 10 medalmen qaıtty. Olar altynnan bólek 4 qola júldege qol jetkizdi. Nátıjesinde 11-orynǵa kóterildi. 2017 jyly atalmysh dúbirli dodada Qytaı Taıbeıinde ótkizildi. Onda bizdiń qorjynǵa 3 alty, 6 kúmis, 7 qola medal tústi. Jalpy komandalyq esepte bizdiń enshimizge 21-oryn buıyrdy.

Bıylǵy Jazǵy ýnıversıada oıyndarynda bizdiń elimizdiń atynan 94 sportshy el namysyn qorǵaıdy. Olardyń arasynda semserlesýden 18 qazaqstandyq sportshy qatysady. Al 16-y jeńil atletıkada jarys jolyna shyqsa, 15-i thekvondodan taıtalasqa túsedi. Al sadaqpen atýdan 8, nysana kózdeýden 10, sporttyq jáne kórkem gımnastıkadan 6, tennısten 4, dzıýdodan 10, sýǵa júzýden 7 sportshy qatysady.

Jazǵy ýnıversıada oıyndarynyń ashylý saltanaty Nur-Sultan ýaqytymen 00.00-de bastalady. Dúbirli dodadaǵy jarystardy «QazSport» telearnasy tikeleı efırde kórsetýdi josparlap otyr.