Búgin «Jaýapty hatshylar týraly» jarlyq kúshine enedi
ASTANA. 26 naýryz. QazAqparat - Búgin «Jaýapty hatshylar týraly» jarlyq kúshine enedi. Bul týraly Astanada QR Prezıdenti janyndaǵy Ortalyq kommýnıkatsııalar qyzmetiniń dástúrli aptalyq brıfınginde Memlekettik qyzmet isteri agenttiginiń tóraǵasy Álıhan Báımenov osylaı málim etti.
«Memlekettik organdardaǵy Jaýapty hatshylardy Elbasy taǵaıyndaıdy. Sondaı-aq, búgin «Jaýapty hatshylar týraly» Jarlyq óz kúshine enedi. Soǵan sáıkes, Jaýapty hatshy laýazymy «A» korpýsyna aýystyrylady. Osy laýazymǵa Memleket basshysy taǵaıyndaý jasaıtyndyqtan, bul laýazymdarmen eńbek kelisimshartyn jasasý quqyǵy Prezıdent Ákimshiliginiń Basshysyna berilgen», - dedi Á. Báımenov.
Onyń sózine qaraǵanda, qazirgi tańda barlyq Jaýapty hatshylarmen kelisimshart jasalǵan. Onda qazirgi Jaýapty hatshylar da, osy laýazymǵa úmitker tulǵalar da 6 aı ishinde «A» korpýsynyń kadrlyq rezervine ótýi shart. Al osy rezervshiler pýly qalyptasqan soń, olardyń arasynan Prezıdent Ákimshiligi kandıdattardy iriktep, Memleket basshysynyń qaraýyna usynatyn bolady. Bul tártip «A» korpýsyna kiretin sanattyń bárine júredi.
