Búgin «Jas ulan» mektebiniń 75 tárbıelenýshisi UBT tapsyrdy (FOTO)

ASTANA. QazAqparat - Qazaqstanda ulttyq biryńǵaı testileý jalǵasýda. Búgin qorytyndy synaqty Armııa generaly S. Nurmaǵambetov atyndaǵy «Jas ulan» respýblıkalyq mektebiniń 75 tárbıelenýshisi tapsyrýda, dep habarlady QR Qorǵanys mınıstrliginiń baspasóz qyzmeti.

Ulandar úshin emtıhan tapsyrý orny bolyp S. Seıfýllın atyndaǵy Qazaq agrotehnıkalyq ýnıversıteti belgilendi. Testileý aıaqtalsa da, qobaljý áli basylar emes, óıtkeni, nátıjesi ázirge belgisiz.

«Biz testileýge jan-jaqty daıyndaldyq jáne sol sebepti joǵary ball kútýdemiz. Qobaljý árıne, boldy. Alaıda, bizge úlken úmit artyp, týysqandarymyzdy, oqytýshylarymyz ben komandırlerimizdi uıatqa qaldyrmaı alǵan bilimimizdi júz paıyzǵa kórsetýge tyrysyp baqtyq», - dedi 5-rotanyń túlegi ulan Erjan Qaıyrǵalıev.

«Jas ulan» mektebi tárbıelenýshileriniń daıyndyq deńgeıi jyl saıyn ósýde. Balalar ulttyq biryńǵaı testileýden súrinbeı ótip, joǵary nátıjeler kórsetýde.

Aıta keteıik, byltyrǵy jyly «Jas ulandy» 67 jetkinshek bitirip shyqty. Búginde olar Qurlyq áskerleriniń Áskerı ınstıtýtynda, eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń Áskerı ınstıtýtynda, Radıoelektronıka jáne baılanys áskerı-ınjenerlik ınstıtýtynda, QR UQK, TJM jáne ІІM joǵary oqý oryndarynda bilim nárinen sýsyndaýda. Olar sondaı-aq Reseı, Belarýs jáne Qytaı qorǵanys mınıstrlikteriniń áskerı joǵary oqý oryndarynyń kýrsanttary bolyp tabylady.