Búgin - «Jas qanat» baıqaýynyń fınaly
ASTANA. QazAqparat - Búgin elorda ákimdiginde Astana qalasy ákiminiń orynbasary Ermek Amanshaev jas oryndaýshylardyń jyl saıynǵy «Jas qanat-2017» baıqaýyna qatysýshylarmen kezdesti.
Aıta keteıik, mundaı kezdesýler ıgi dástúrge aınaldy, dep habarlaıdy elorda ákimdiginiń resmı saıty .
Kezdesý barysynda jas oryndaýshylar baıqaýda alǵan áserlerimen, josparlarymen bólisti.
Eske salaıyq, Qazaqstan táýelsizdigin alǵaly ótkizilip kele jatqan «Jas qanat» baıqaýy ótken jyly óziniń 25 jyldyǵyn atap ótti. Atalǵan baıqaý kóptegen jas oryndaýshylardyń jolyn ashty, búginde olar mıllıondaǵan kórermenniń kózaıymyna aınaldy. Atap aıtqanda, Medeý Arynbaev, Erlan Kókeev, Nurlan Abdýllın, «Úrker» toby, Baqyt Shadaeva, Janar Doǵalova, Mádına Sádýaqasova, Marjan Arapbaeva, «Melo'Men» toby, Qurmash Mahanov, Sáken Maıǵazıev, Gaýhar Qaspakova, Janna Sattarova, Altynaı Jorabaeva, Janna Orynbasarova, Nurlan Alban, Beıbit Qorǵan, Gúlnur Orazymbetova jáne t.b.
«Jıyrma altynshy baıqaý jáne ár joly jańa. Halyq aldyna shyǵý úshin jas oryndaýshylardyń repertýaryn jasaý kerek, sapaly árleý kerek. Bir jaǵynan baıqaý múmkindik beredi, ony qalaı paıdalanasyń? Erteń uıqydan kóz ashqanda, jaryq ta, applodısment te bolmaıdy. Osy kezde ómirlerińdegi baıqaý bastalady deımin. Basty baıqaý «Jas qanat» emes, odan keıin bolady. Bul mektep», - dedi baıqaýdyń bas prodıýseri Murat Erǵalıev.
Aıta keteıik, 2012 jyly baıqaýdyń bas júldesin Dımash Qudaıbergen ıelendi. Sol kezdegi bala Dımash búginde Qytaıda ótken álemge tanymal «I am a Singer» baıqaýyna qatysyp, tórtkúl dúnıege tanyldy. Dımashtyń ákesi Qanat Aıtbaev quttyqtaýǵa jaýap retinde ulynyń tabysqa jetýinde «Jas qanattyń» da úlesi baryn aıtyp, Murat Erǵalıevke alǵys bildirdi.
Búgin baıqaýdyń fınaly ótedi. Kezdesý sońynda jas ánshiler Abaıdyń «Aıttym sálem, qalamqas» ánin birge oryndady.
