Búgin ıamaıkalyq jeńil atlet Ýseın Bolt 10 dúrkin álem chempıony atanýy múmkin
ASTANA. QazAqparat - Búgingi tańda dúnıe júzindegi sport súıer qaýymnyń nazary Qytaı astanasy Beıjińde ótip jatqan álem chempıonatyna aýyp otyr. Jer sharynyń tek qana úzdikteri bas qosqan dúbirli dodanyń ár kúni qyzyqty ótýde. Qazaqstan jurtshylyǵy bul jarysty «Eýrosport» telearnasynan kórý múmkindigine ıe boldy.
2015 jylǵa deıin Olımpıadanyń 6 dúrkin, álemniń 8 dúrkin jeńimpazy bolǵan ıamaıkalyq jelaıaq Ýseın Boltqa degen kórermenniń nazary erekshe. Ol osy chempıonattyń alǵashqy kúnderi-aq 100 metrlik jarysta jeńimpaz atanyp, álemdik jarysty 9-shy márte jeńip aldy. Keshe ol 200 metrlik jarystyń irikteý jáne jartylaı fınaldyq básekelerine qatysyp, óziniń bas júlde alýǵa daıyn ekendigin málimdedi. Endi búgin keshke (Astana ýaqytymen saǵat 18-55) erler arasynda 200 metrlik jarystyń fınaly ótedi. Ýseın Bolt búgin jeńiske jetse, ol álemniń 10 dúrkin jeńimpazy atanatyny sózsiz.
29 jastaǵy sportshy munymen toqtap qalmaıdy. Kelesi kúnderi 400 metrge estafetalyq jarystar ótedi, ıAmaıka komandasy qatysyp, jeńiske jetetin bolsa, 11 dúrkin jeńimpaz atanýy múmkin.
Ýseın Bolt jarysqa qatysyp kele jatqan kezeńde 8 márte álemdik rekordty jańartqan! Eki (Beıjiń - 2008, London - 2012) Olımpıadada qatarynan 100 jáne 200 metrlik jarysta jeńimpaz atanǵan álemdegi birden-bir sportshy! Laqap aty - naızaǵaı. 1986 jyly 21 tamyzda dúnıege kelgen. Boıy 195 sm, salmaǵy 94 keli.
