Búgin XXIII qysqy Olımpıadaǵa týra 30 kún qaldy
Aqpan aıynyń 9-25 kúnderi aralyǵynda ótetin basty dodaǵa Qazaqstan qazirgi tańda sporttyń 4 túrinen 33 lıtsenzııa alyp úlgerdi. Onyń 10-y bıatlonshylarǵa, 10-y short-trekshilerge, 3-eýi mánerlep syrǵanaýshylarǵa jáne 10-y konkımen júgirýshilerge tıesili.
Qysqy sport túrlerinen jańa maýsym endi bastalǵandyqtan Olımpıadaǵa deıin joldamalar sany áli de artatyny anyq. Jalpy qazaq sportshylary Olımpıadada toǵyz sport túrinen óner kórsetýdi josparlap otyr. Dodanyń resmı ashylý saltanatynda Qazaqstan týyn Short-trekten álem kýbogynyń, Ýnıversıada, Azııa oıyndarynyń júldegeri, 2014 jylǵy Sochıde ótken Olımpıada oıyndarynyń qatysýyshysy Abzal Ajǵalıev kóterip shyǵady.
XXIII qysqy Olımpıadaǵa 95 ulttyq Olımpıadalyq komıtettiń atynan 2 900 sportshy qatysady dep kútilýde. Jalpy 102 medal jıyntyǵy sarapqa salynady.
Jarys eki klasterde ornalasqan 12 sport nysanynda ótedi. Olar - Phenchhen taý klasteri (PyeongChang Mountain Cluster) jáne Kannyn jaǵalaý klasteri (Gangneung Coastal Cluster).
