Búgin UEFA Konferentsııa lıgasynda qazaqstandyq klýbtardyń qatysýymen úsh oıyn ótedi
NUR-SULTAN. QazAqparat - Búgin UEFA Konferentsııa lıgasynda qazaqstandyq klýbtardyń qatysýymen úsh oıyn ótedi, dep habarlaıdy QazAqparat tilshisi.
Elordalyq «Astana» saǵat 21.00-de Nur-Sultan qalasynda Polshanyń «Rakýv» komandasyn qabyldaıdy.
Kezdesý barysynda chehııalyq Tomash Klıma bas tóreshi qyzmetin atqarady. oǵan otandastary Ivo Nadvornık pen Lýkash Mahats kómekshilik jasıdy. Qosalqy tóreshi de sol eldiń ókili Ladıslav Shıkshaı.
Oıyn «Qazsport» telearnasynan tikeleı efırde kórsetiledi.
Al saǵat 22.00-de Vengrııada «Kıshvarda» Almatynyń «Qaırat» komandasymen jasyl alańǵa shyǵady. Kezdesýge bas tóreshi retinde kıprlik Krısovalantıs Teýlı belgilengen. Kómekshileri - sol elden kelgen Mıkael Soterıý pen Pavlos Georgıý. Tórtinshi tóreshi de kıprlik Georgıos Nıkolaý.
Oıyn «Astana» men «Rakýv» kezdesýi bitkennen keıin «Qazsport» telearnasynan kórsetiledi.
Sondaı-aq, 28 shildeden 29 shildege qaraǵan túni saǵat 00.30-da Horvatııada «Osıek» pen «Kyzyljar» oınaıdy, oǵan grekııalyq tóreshiler brıgadasy qyzmet atqarady. Alań tórinde Anastasıosa Papapetrý qyzmet etse, oǵan Trıfon Petropýlos pen Iordanıs Aptosoglý, kómekshilik jasaıdy. Qosalqy tóreshi de grekııalyq Andreas Gamarıs.
Kezdesý «Qazsport» telearnasynan tikeleı efırde kórsetiledi.
Eske salsaq, ázirge qazaqstandyq klýbtar qatarynan «Tobyl» ǵana úshinshi irikteý satysyna joldama aldy. Qostanaılyq klýb eki oıynnyń nátıjesimen (2:0, 1:0) Gıbraltardyń «Lınkoln Red Imps» komandasyn orta jolda qaldyrdy.
