Búgin Túrkistan oblysynyń qurylǵanyna 2 jyl toldy
TÚRKІSTAN. QazAqparat – Búgin Túrkistan oblysynyń qurylǵanyna 2 jyl tolyp otyr. Osyǵan oraı oblys ákimi Ómirzaq Shókeev túrkistandyqtardy arnaıy quttyqtap, eki jylda eńserilgen jumystarǵa toqtaldy, dep habarlaıdy QazAqparat tilshisi.
Óńir basshysy óz sózinde túgel túrki dúnıesiniń kóshbasshysyna aınalǵan Nursultan Nazarbaevtyń 2018 jylǵy 19 maýsymdaǵy tarıhı taǵylymdy Jarlyǵy Túrkistannyń túleýine erekshe serpin bergenin atap ótti. Sodan bergi 2 jylda Túrkistan oblysynyń áleýmettik-ekonomıkalyq áleýetiniń artyp kele jatqanyn da tilge tıek etti.
«Osydan týra eki jyl buryn maýsym aıynda Uly Túrkistan dalasynda úlken jańalyq bolǵany belgili. Qazaqstannyń ǵana emes, men Túrkistan oblysy quryldy. Elbasynyń arqasynda túrki áleminiń tekti tóri Túrkistan qalasy óńir ortalyǵyna aınaldy. Kóregen kóshbasshymyzǵa uzaq ómir, qajymas qaırat tilep, búkil túrkistandyqtar atynan shynaıy Alǵysymyzdy da jetkizgim kelip otyr.Memleket basshysy Qasym-Jomart Toqaev ta óz tarapynan jańa Túrkistannyń órleýine barynsha qoldaý jasap, jan-jaqty damýyn tikeleı qadaǵalap otyr. Tarıhı ólshemmen qarasaq, bul óte qysqa ýaqyt. Alaıda atqarylǵan qyrýar jumys nátıjesinde Túrkistannyń jańa kelbeti, jańa bolmysy qalyptasyp keledi», - dedi Ómirzaq Estaıuly.
Aımaq basshysy basty maqsat - Túrkistandy zamanýı qala etý, ómir súrýge yńǵaıly, jaıly etý ekenin atap ótti. Osy baǵytta kıeli shahar arqyly «Batys Qytaı –Batys Evropa» avtojoly, temir jol ótedi, jyl sońyna deıin iske qosylatyn Halyqaralyq aeroport – qalanyń ósý potentsıalyn taǵy da arttyratyny sózsiz.
Aıta keteıik, búginde Túrkistan qalasynda alǵashqy kezekte 175 nysannyń qurylysy josparlansa, sonyń 102-si jyl aıaǵyna qaraı paıdalanýǵa beriletin bolady. Túrkistannyń týrısttik, bilim ortalyǵy retinde damytý úshin arnaıy Týrızm jáne meımandostyq ýnıverstıteti ashyldy, rýhanı-mádenı ortalyq retinde damytý úshin 2019 jyly 9 áleýmettik nysan tapsyrylsa, bıyl 20 nysan qurylysy aıaqtalyp, el ıgiligine berilmek. Jańadan qalyptasqan oblysta jumys isteýge búkil respýblıkadan mamandar kelip jatyr, olardy baspanamen qamtý mańyzdy máseleniń biri bolyp otyr.
«Ótken jyly qalada 1128 otbasy jańa páterge qonystansa, búgingi kúnge túrli qarjylandyrý kózderi arqyly 6300 páterdi quraıtyn 136 kópqabatty úıdiń qurylysy jalǵasýda. Sońǵy 2 jylda Túrkistan oblysynyń ekonomıkasyna túrli qarjy kózderi baǵyttalǵan. Bir ǵana Túrkistan qalasyna salynǵan ınvestıtsııa kólemi 160 mlrd teńgeden artqan. Óńir aýylsharýashylyǵy, qurylys, mádenıet, sport, ınvestıtsııa tartý jáne basqa salalarda da naqtyly ilgerileýshilikterge jetip otyr»,- dedi oblys ákimi.
Ómirzaq Estaıuly tolymdy tabystardan bólek, oblysta sońǵy jyldary birqatar qıyndyqtar da oryn alǵanyn jasyrmady. Arys jarylysy, Tólebı men Maqtaaral aýdanyndaǵy sý tasqyny zardaptaryn joıý jumystary da júıeli túrde júzege asýda. Bul qıyndyqtardy birge eńserip kele jatqan oblys jurtshylyǵyna alǵysyn bildirgen óńir basshysy túrkistandyqtardy jańa tarıhtyń jazylýyna úles qosýǵa shaqyrdy.
