Búgin túnde Petropavlda 9 blok beket jumysyn bastaıdy
SQO polıtsııa departamenti baspasóz qyzmetiniń málimetinshe, 1 sáýirden bastap oblys ortalyǵynan aýdandarǵa jolaýshylar tasymaldaýdyń barlyq túrlerine tyıym salyndy. Kólik sanyn azaıtý úshin oblys ortalyǵyna kirip-shyǵý shekteledi.
«Beketterde qujattar tekserilip, qalaǵa kelý nemese odan ketý sebepteri anyqtalady. Osyǵan baılanysty sebepsiz qalaǵa kirmeýge ne bolmasa shyqpaýǵa keńes beremiz. Azamattar jeke bastaryn kýálandyratyn qujattaryn ózderimen birge alyp júrýge mindetti», - deıdi SQO polıtsııa departamentiniń bastyǵy Marat Tólebaev.
Blok-beketterde polıtseılermen birge veterınarlyq jáne sanıtarlyq-epıdemıologııalyq qyzmetterdiń mamandary kezekshilik atqarady. Túngi ýaqytta Petropavl qalasyna kirip-shyǵýǵa tek qajetti taýarlardy, azyq-túlikti, dári-dármekti, medıtsınalyq buıymdardy, jeke gıgıena zattaryn tasymaldaıtyn kólik quraldary men tranzıttik kólikterge ǵana ruqsat etiledi.
Polıtseıler eldegi tótenshe jaǵdaıǵa oraı erekshe rejımde jumys istep, koronavırýstyq ınfektsııanyń taralýyna qarsy kúreske baǵyttalǵan is-sharalarǵa tikeleı qatysady. Tártip saqshylary turǵyndardyń úı karantınin saqtaýyn baqylap, naýqas adamdarmen qarym-qatynas jasaǵan adamdardy jáne birinshi sanattaǵy elderden kelgenderdi izdestirýmen, sondaı-aq provızorlyq jáne karantındik statsıonarǵa ornalastyrylǵandardy kúzetýmen aınalysady. Qala aýmaǵyn jáne qaýipti indet oshaqtary shegindegi turǵyn úılerdi kúzetý de polıtseılerge júktelgen.
Eldi mekenderde tıisti quqyqtyq tártipti qamtamasyz etý maqsatynda kún saıyn oblys boıynsha 400-den astam polıtseı kezekshilikke shyǵady. 127 baǵyt bar, onyń 68-i avtopatrýl, 59-y patrýldeýdiń jaıaý baǵyty.
19-31 naýryz aralyǵynda ótkizilgen reıd nátıjesi boıynsha tótenshe jaǵdaı rejımin buzýdyń 41 deregi tirkeldi. Mamandandyrylǵan ákimshilik sot 32 mekemeniń ıesin jaýapkershilikke tartty. Olardyń 22-si qamaýǵa alyndy, 10-na aıyppul salyndy. Qalǵan materıaldar sottyń qaraýynda.