Búgin túnde Astananyń Ýspen kafedraldy soborynda merekelik lıtýrgııa ótedi
ASTANA. QazAqparat - 7 qańtarda barsha pravoslavıelik hrıstıandar Rojdestvo merekesin atap ótedi. Rojdestvo aldyndaǵy keshte Sochelnık bolady. Bul túni Rojdestvo aldyndaǵy aýyz bekitý aıaqtalyp, dástúrli taǵamdarǵa toly merekelik dastarhan jaıylady.
«Bıylǵy jyl beıbitshilik pen kelisim jyly bolsyn, ony qudaıǵa syıynyp, tazalyqta ótkizeıik», - dedi Qazaqstan Respýblıkasyndaǵy orys pravoslavıe shirkeýiniń Mıtropolıt okrýginiń basshysy, Astana jáne Qazaqstannyń mıtropolıti Aleksandr óziniń quttyqtaý sózinde. Astana qalasy Din isteri basqarmasynyń habarlaýynsha, merekelik qudaıǵa qulshylyq etý sharalary barlyq pravoslavıelik soborlarda uıymdastyrylady. Búgin Ýspen kafedraldy soborynda saǵat 21:00-de rojdestvolyq lıtýrgııa aldyndaǵy qulshylyq etý, al saǵat 23:00-de túngi merekelik lıtýrgııa ótedi. 7 qańtarda merekelik sharalar tańerteń saǵat 8.00-de qudaıǵa qulshylyq etýden bastalady. Saǵat 9.00-da tańǵy merekelik lıtýrgııa, al saǵat 11:00-de Qazaqstan pravoslavıelik shirkeýi men memlekettik bılik ókilderiniń quttyqtaý rásimi ótedi. Mereke sońynda saǵat 17:00-de Ýspen kafedraldy soborynda rojdestvolyq kesh uıymdastyrylady, dep habarlanǵan elorda ákimdiginiń resmı saıtynda.
