Búgin tún jarymda «Astana Tańdaýy» halyqtyq baıqaýyna daýys berý aıaqtalady
ASTANA. 24 maýsym. QazAqparat - 15 kúnge sozylǵan «Astana Tańdaýy» baıqaýynyń úmitkerlerine halyqtyq daýys berý aıaqtalýǵa taıaldy. Jaqynda óz qaharmandaryn búkil el biletin bolady. Daýys berýdiń jabylýyna birneshe saǵattar ǵana qaldy. Aldyn ala jasalǵan esep boıynsha, ózderiniń daýystaryn 74 185 adam bergen, dep habarlady astana.kz saıty.
Qala turǵyndary «Astana Tańdaýy» baıqaýynda úzdik muǵalimdi, dárigerdi, ınspektordy, qurylysshyny, jolshy men qoǵamdyq kólik júrgizýshisin jáne energetıkti bar yntalarymen tańdaýda.
Ótinim qabyldaý 1 naýryzda bastalyp, 10 shildege deıin uzartyldy. Osy ýaqytta 7 atalym boıynsha 170 ótinim kelip tústi. Al daýys berý elorda ákimdiginiń www.astana.kz. resmı ınternet resýrsynda 10 maýsymnan bastaldy.
Tek birinshi táýlikte ǵana 7000-ǵa tarta adam «Astana Tańdaýy» baıqaýy úmitkerine daýys berdi. Al 10 kúnde www.astana.kz. resmı ınternet resýrsynda 25000-nan astam jańa biregeı paıdalanýshy paıda boldy.
Bıylǵy jylǵy jańalyqtyń biri daýystardy adamnyń qatysynsyz kompıýterlik baǵdarlama sanaıdy. Astana ákimdigi saıtyndaǵy halyqtyq daýys berý júıesi tek bir adamǵa bir ret elektrondy daýys berýge múmkindik týǵyzady. Osy turǵydan alǵanda, daýys berý shynaıy jáne ádiletti bolyp tabylady.
Eń kóp jáne belsendi muǵalim atalymy boıynsha baıqaýǵa 58 pedagog usynyldy. Ekinshi orynda 32 «úzdik» medıtsına qyzmetkeri ataǵyna usynylsa, úshinshi orynǵa 24 úmitkerge daýys bergen energetıkter shyqty. Sonymen qatar, baıqaýǵa 17 ınspektor, 16 qurylysshy, 14 jolshy, 9 qoǵamdyq kólik júrgizýshisi qatysýda. Daýys berý 10 maýsymda bastalyp, búgin tún ortasyna deıin jalǵasady.
Ár atalymdaǵy daýys sany boıynsha búgin áleýetti kóshbasshy anyqtaldy. Jekelegen pedagogtarǵa 20 myńǵa tarta adam daýys berdi. Alaıda, túpkilikti nátıjeni tek erteń kórýge bolady.
Jalpyqalalyq «Astana Tańdaýy» baıqaýynyń jeńimpazdaryna halyq súıispenshiliginen basqa materıaldyq júldeler tapsyrylady. Olardy marapattaý 6 shilde kúni Kongress-hollda ótedi.
