Búgin - Temeki shegýden bas tartýdyń halyqaralyq kúni
ASTANA. Qarashanyń 19-y. QazAqparat - Búgin - Temeki shegýden bas tartýdyń halyqaralyq kúni. 1977 jyly Amerıka onkologııalyq qoǵamy bekitken bul ataýly kún jyl saıyn qarashanyń árbir úshinshi beısenbisinde atap ótiledi.
Dúnıejúzilik densaýlyq saqtaý uıymynyń málimetteri boıynsha,álemde ókpe qaterli isiginen qaıtys bolǵandardyń - 90 paıyzy, sozylmaly qolqa dertinen kóz jumǵandardyń - 75 paıyzy jáne júrektiń ıshemııalyq aýrýynan qaıtys bolǵandardyń 25 paıyzy temeki shegýdiń saldarynan eken. Oǵan qosa, árbir 10 sekýnd saıyn álemde bir shylymqor kóz jumady eken (2020 jylǵa deıin bul deńgeı ár 3 sekýnd saıyn bir adamǵa jetýi múmkin).
Temeki shegýden bas tartýdyń halyqaralyq kúniniń maqsaty - temekige táýeldilikti tómendetý, temegi shegýmen kúreske barlyq adamdardy tartý, temeki shegýdiń aldyn alý jáne temekiniń adam densaýlyǵyna zııany týraly qoǵamdy habardar etý.
