Búgin Táýelsizdik saraıynda Sársenbaı Álıevtiń kórmesi ashylady
ASTANA. QazAqparat - Konstıtýtsııa kúni qarsańynda elordadaǵy «Táýelsizdik saraıynda» Álıev Sársenbaı Sálmenulynyń «Týǵan jerim» atty jeke kórmesiniń saltanatty ashylýy ótedi.
Sársenbaı Álıev 1954 jyly 22 naýryzda Atyraý oblysy Teńiz aýdanynda dúnıege kelgen.
1978 jyly Almaty kórkemsýret ýchılışesinde syzý jáne sýret pániniń muǵalimi mamandyǵyn aldy.1986 jyly T.Júrgenov atyndaǵy «Teatr jáne kórkemsýret» akademııasyn sahna bezendirý jáne tehnolog mamandyǵy boıynsha bitirdi. 2005 jyly qazan aıynda O.Tańsyqbaev atyndaǵy qoldanbaly qolóner kolledjinde, Qyzdar pedagogıka ınstıtýtynda «kásiptik oqytý jáne eńbek» kafedrasynyń oqytýshy qyzmetinde arnaıy kýrs pánderinen dárister men praktıkalyq sabaqtar ótkizedi. 1990 jyldan bastap Jýrnalıster Odaǵynyń múshesi. «Qazaq sovet entsıklopedııasynda», «Shańyraq», «Aqmola», «Negesh» entsıklopedııalarynyń kórkemdeýshi ǵylymı redaktory bolǵan.1987 jyldan bastap respýblıkalyq jáne halyqaralyq kórmelerge qatysqan.
2001 jyly Atyraý oblystyq murajaıynda sýretshiniń jeke kórmesi ashyldy. 2004 jyly Ǵalymdar úıinde «Ular» gallereıasynda kórmesi ótti. 2007 jyldan Qazaqstan Sýretshiler Odaǵynyń múshesi. 2008 jyly «Dala áýenderi» degen atpen kórme-aýktsıonǵa qatysty.
S.Álıev 2013 jyly 12 jeltoqsanynda «Mádenıet salasynyń úzdigi» tósbelgisimen marapattaldy. 2013 jyly Reseı Federatsııasynyń Or qalasynda ótken beıneleý óneriniń avtorlyq shyǵarmashylyq jumystarynyń VI halqaralyq festıval-konkýrsyna shyǵarmashylyq jumystarymen qatysyp, júldeli oryndarǵa ıe boldy.
Kórme búgin, 26 tamyzda saǵat 17.00-de ashylady.
