Búgin Táýelsizdik saraıynda «Qazaqstan» telearnasynyń tolyq memlekettik tilde habar taratýǵa kóshýiniń tanystyrylymy ótedi

dep habarlady Baılanys jáne aqparat mınıstrliginiń baspasóz qyzmeti.

Saltanatty sharaǵa Qazaqstan Respýblıkasy Prezıdenti Ákimshiligi basshysynyń orynbasary Máýlen Áshimbaev, Qazaqstan Respýblıkasy Baılanys jáne aqparat mınıstri Asqar Jumaǵalıev jáne tanymal qoǵam qaıratkerleri men aqyn-jazýshylar, BAQ ókilderi qatysady.

Memleket basshysy N.Á.Nazarbaevtyń bıylǵy aqpan aıynda respýblıkadaǵy jetekshi buqaralyq aqparat quraldary ókilderimen ótkizgen suhbatynda «Qazaqstan» telearnasyna tolyq qazaq tilinde habar berýge kóshýi qajettigin júktegen bolatyn. Osyǵan sáıkes qyrkúıek aıynan bastap, «Qazaqstan» arnasy tolyq qazaq tilinde habar taratýǵa kóshti. Jarty ǵasyrdan astam tarıhy bar Ulttyq arnanyń jańa dáýiri bastalmaq. «Qazaqstan» Ultyq arnasy elimizdiń aqparat keńistiginde ulttyq sanamyz ben tilimizdiń bolashaǵyna jańa serpin ákeleri sózsiz.

Jańa maýsymdaǵy jańa jobalar: «Saz tolǵaý» mýzykalyq-tanymdyq tok-shoýy, «Daýa» medıtsınalyq baǵdarlamasy, «Alań» pikirtalas klýby, «Iman aınasy» habary, «Otandastar» derekti fılmder toptamasy, «Táýelsizdik shejiresi» derekti fılmder jıyntyǵy, «Damý» ındýstrııalandyrý tok-shoýy, «Eki juldyz» mýzykalyq oıyn-saýyq shoýynyń 4-shi kezeńi, «Bolashaq» otandyq teleserıaly, «Ózekjardy» jobasy.

«Qazaqstan» RTRK bazasynda byltyr 27 qyrkúıekte «Balapan» telearnasy ashylǵany belgili. Qurylǵanyna jyldyń júzi ǵana bolǵan jańa arna túrli janrdaǵy qyzyqty baǵdarlamalar men álemniń úzdik anımatsııalyq týyndylaryn kórsetip, kishkentaı kórermenderdiń kóńilinen shyǵa bildi. Atalmysh arna óskeleń urpaqty bıik maqsattarǵa, adamı qundylyqtarǵa jeteleıtin otandyq teletýyndylarmen áli de qýanta bermek. Jyl boıy efırden «Sheberhana», «Kel, oınaıyq», «Án salaıyq», «Aıjuldyz», «Aıgólek, «Erketaı» «Tolaǵaı» syndy baǵdarlamalarymyz kórsetilse, jańa maýsymda «Sanamaq» tanymdyq baǵdarlamasy, «Júzden júırik» tanymdyq, sporttyq, oıyn-saýyqtyq baǵdarlamasy, «Tentegim» ázil-syqaq baǵdarlamasy, «Hello, Balapan!» oqý-tanymdyq baǵdarlamasy, «Baýyrsaq» tanymdyq baǵdarlamasy, «Qulynshaq» baǵdarlamasy, «Baldyrǵan» mýltserıaly sııaqty jańa jobalar qosyldy.

Udaıy kórermenniń údesinen shyǵa bilýdi nazarǵa alǵan «Qazaqstan» RTRK bıyl «Mádenıet» telearnasynyń tusaýyn kespek. 26 qyrkúıekten efırge jol tartatyn mádenı-aǵartýǵa baǵyttalǵan jańa arna 80 %-y memlekettik tilde, 20%-y ózge tilderde habar taratatyn bolady. Arnanyń alǵa qoıǵan maqsaty: aýdıtorııany otandyq jáne álemdik mádenıettiń baı ári mol qorymen tanystyrý, Qazaqstan halqynyń tarıhı jáne mádenı mol murasyn saqtap qalý, qazaq tilin, rýhanı-adamgershilik qundylyqtardy nasıhattaý. Qazaq aýdıtorııasy spýtnık arnalary arqyly teleentsıklopedııalardy, eń úzdik qazaq kınosyn, Keńes odaǵy tusynda shyǵarylǵan kórkem týyndylardy, derekti fılmderdi, álemdik kınematografııanyń biregeı týyndylaryn, tarıhtan jáne ataqty tulǵalardyń ómirbaıanynan syr shertetin baǵdarlamalardy, ǵylymı-aǵartýshylyq baǵdarlamalardy, opera jáne kontserttik baǵdarlamalardy, telespektaklder men balet qoıylymdaryn tamashalaıtyn bolady. Teledúnııa álemine táı-táı basqan jańa arnadan kelesi jobalar jaryq kórmek: «Aqsaraı» mýzykalyq-tanymdyq habary. Baǵdarlamada elimizdiń dástúrli jáne klassıkalyq teatrlarynyń súbeli týyndylary teletranslatsııa arqyly kórermenge jol tartady; «Sol jyldar» tanymdyq baǵdarlamasy. Baǵdarlama zertteý janrynda qurylady. Negizgi keıipkerleri: otandyq mádenıettiń qalyptasýyna, damýyna at salysqan tulǵalar. «Órkenıet» baǵdarlamasy - qazaqtyń zııaly qaýym ókilderiniń pikirtalasy. Baǵdarlamanyń negizgi arqaýy: qaryshtap damyǵan zamanaýı mádenıettiń artyqshylyǵy, jahandaný máseleleri. «Qyl qalam» habary - Qazaqstan sýretshileriniń antologııasyn usynady. «Ǵasyrlar pernesi» baǵdarlamasy. Onyń barysynda qazaqtyń ǵajaıyp dástúrli mýzykalyq shyǵarmalary men túrki mádenıetiniń ozyq óner týyndylary oryndalady. «Altyn kómbe» baǵdarlamasynyń basty maqsaty - kitapqa degen súıispenshilikti oıatý. Otbasylyq komandalardy saıystyrý arqyly kitap oqýdy otbasylyq daǵdyǵa aınaldyrýǵa kúsh salý. «Áli esimde» baǵdarlamasy jobanyń negizgi kúretamyry - qazaqtyń estradalyq mýzykasynyń tarıhy bolmaq. «Kitaphana» baǵdarlamasynyń negizgi ózegi - qazaq ádebıetiniń tanymal shyǵarmalary men qundy tarıhı basylymdary. «Júzdesý» habary shyǵarmashylyq ıeleriniń buralańy kóp óner jolyndaǵy belesterin baıandaıdyi.

Budan basqa, «Abaı» 5 serııaly derekti fılmi - qazaqtyń kemeńger uly aqyny Abaıdyń ómir joly, shyǵarmashylyǵy jaıly derekti fılm. «Qazaq dalasynyń qupııalary» 10 serııaly derekti fılmder tsıkly, «Kókjıek» telelektsııa formatyndaǵy ǵylymı-tanymdyq jobasy, «Mádenıet» baǵdarlamasy - elimizde ótip jatqan mádenı sharalarǵa sholý jáne osy saladaǵy jańalyqtarǵa keńinen toqtalý bolmaq. «Legendy ı mıfy opernogo» - opera jáne balet óneriniń sańlaqtary týraly mýzykalyq-tanymdyq janrdaǵy baǵdarlamalar tsıkly, bolsa, «Raskrytaıa partıtýra» habarynyń maqsaty - kórermenge klassıkalyq mýzyka jaýharlaryn jáne elimizdegi mýzykalyq toptardy tanystyrý. «Neslýchaınye vstrechı» habarynda mádenıet juldyzdarymen keleli áńgime arqaý bolmaq.

Jańa arna «Qazaqstan» respýblıkalyq teleradıokorporatsııasynyń negizinde ashylyp, efırge spýtnık, ınternet jáne kabeldik jeliarqyly taralady.