Búgin Tartyl Fest sońǵy kezeńi Nur-Sultanda ótedi

NUR-SULTAN. QazAqparat – Búgin elordada týrnıkte tartylý boıynsha Tartyl Fest respýblıkalyq sport festıvaliniń sońǵy kezeńi ótedi, dep habarlaıdy QazAqparat tilshisi.

Tartyl Fest Prezıdent janyndaǵy «Dara» qoǵamdyq qorynyń qoldaýymen ótip jatyr.

Búgin týrnırdiń sońǵy 20-kezeńi Nur-Sultan qalasynda, burynǵy EXPO aýmaǵyndaǵy sahnada ótedi.

Uıymdastyrýshylardyń aıtýynsha, saǵat 09:00-den 11:00-ge deıin tirkeý, ólsheý jáne qatysýshylarǵa nómirler berý jumysy júrgiziledi.

Festıval resmı túrde 14:00-de ashylady.

Búkil qaladaǵy qatysýshylar úshin ereje birdeı: durys jáne eń kóp tartylý. Jalpy alǵanda festıvalge elimizdiń 19 qalasynan 12 myńǵa jýyq adam qatysqan.

Qatysýshylar salmaǵy men jasyna baılanysty toǵyz sanatta jarysady. Jarysty resmı tóreshiler alqasy baqylaıdy. Júlde qory - 3 000 000 teńge.

Týrnıkke tartylý festıvali 10 shildede Qonaev qalasynda bastalǵan edi.

Keıin Túrkistanda, Taldyqorǵan, Almaty, Taraz, Shymkent, Aqtaý, Qyzylorda, Atyraý, Oral, Aqtóbe , Qostanaı, Petropavl, Kókshetaý, Jezqazǵan, Qaraǵandy, Óskemen, Semeı qalalarynda jalǵasyn tapty.

Shymkenttik Azamat Sapar týrnıkte 41 ret tartylyp, rekord ornatty. Buǵan deıin týrnıkke tartylý boıynsha rekord jasaǵan almatylyqtardy (40) basa ozyp, myqtylyǵyn dáleldedi.

Al, 13 ret tartylǵan jeti jasar Mádıhan Qajymuqan uıymdastyrýshylardyń arnaıy syılyǵyna ıe boldy.

Odan keıin Aqtaý qalasynda 32 jastaǵy qatysýshy Damır Nábıev beltermirge 44 ret tartylyp, jańa rekord ornatty.

Bul rekordty 51 jastaǵy qostanaılyq Andreı Antonıan jańartty, ol týrnıkke 45 márte tartyldy.

Qaraǵandyda ótken týrnırde tarazdyq Evgenıı Nam esimdi qatysýshy týrnıkke 50 ret tartyldy. Osylaısha, ázirge Tartyl Fest rekordy Taraz qalasyna tıesili.

Jalpy festıval elimizdiń 20 qalasynda uıymdastyrylady, onda qazaqstandyqtar aqshalaı júlde jeńe alady. Ár qalada 27 jeńimpaz tańdalady.

Birinshi oryn úshin qatysýshylar 200 myń teńge, ekinshi oryn úshin – 100 myń teńge, úshinshi oryn úshin – 50 myń teńge aqshalaı syılyq alady.

Ár qalanyń jeńimpazdary (toǵyz sanatta) elordada ótetin grand-fınalǵa qatysady, onyń kúni jaqyn arada belgili bolady.

Grand-fınal chempıondary Street workout boıynsha álem chempıonatyna joldama alady.

Joba ambassadory rólin qoǵam qaıratkeri, jattyqtyrýshy jáne akter Aıtym Jaqypov somdamaq.

Ol Qazaqstanda jáne álemde Street workout boıynsha birneshe dúrkin rekordshy, Streetlifting boıynsha Eýropa rekordsmeni, sondaı-aq Qazaqstandaǵy Street workout qozǵalysynyń negizin qalaýshylardyń biri.

Street workout – kóshedegi sport alańdarynda túrli jattyǵýlar jasalatyn áýesqoı sport túri.