Búgin tańerteń elordada 57 kólik apaty bolyp, bir adam zardap shekti
ASTANA. QazAqparat – Búgin tańerteńnen beri elorda aýmaǵynda 57 jol-kólik apaty tirkeldi. Bul týraly Astana qalalyq polıtsııa departamentinen málim etti, dep habarlaıdy QazAqparat tilshisi.
«Astana qalasynyń polıtsııa departamenti aýa raıynyń nasharlaýyna jáne kóktaıǵaq bolýyna baılanysty júrgizýshilerge qyraǵy ári abaı bolýǵa shaqyrady. Tańerteńgi saǵat 07:00-den beri elorda aýmaǵynda 57 jol-kólik oqıǵasy bolyp, 1 adam zardap shekti», - delingen habarlamada.
Polıtsııa júrgizýshilerdi jol júrisi erejesin, jyldamdyq rejımin, qaýipsiz araqashyqtyqty qatań saqtaýǵa shaqyrady.
«Kólik quraldarynyń júrgizýshileri kúrt burylys jasap, shuǵyl toqtaýdan saqtanýy qajet. Oryn alǵan qolaısyz aýa raıy kezinde mundaı jaıt kólik quralyn basqara almaı qalýǵa ákelýi múmkin. Sonymen qatar kólikti júrgizip kele jatqanda gadjetterdi paıdalanbańyzdar», - dep eskertedi vedomstvodan.
