Búgin tańerteń Almatyda taǵy jer silkindi

QR Bilim jáne ǵylym mınıstrligi «Seısmologııalyq tájirıbe-ádistemelik ekspedıtsııasy» memlekettik mekemesiniń (QR BǴM «STÁE» MM) aqparatyna sáıkes, 4 mamyr tańerteńgi saǵat 8.25-te Almaty qalasynan 75 shaqyrym jerde jer silkindi. MSK-64 baǵany boıynsha 2-3 ball qýatymen jerasty dúmpýleri Malovodnoe jáne Eńbekshiqazaq aýdanyndaǵy Túrgen kentterinde sezildi.

QR Tótenshe jaǵdaılar mınıstrliginen anyqtaǵandaı, qurbandar men qıraýlar týraly aqparattar joq.

«QR BǴM «STÁE» MM, Seısmologııa ınstıtýty jáne QR TJM «Boljam» ǵylymı-óndiristik kesheniniń boljamdary boıynsha, 2011 jylǵy 28 sáýir men 4 mamyr aralyǵynda Almaty boljaý polıgonynyń aýmaǵynda MSK-64 seısmıkalyq baǵany boıynsha qýaty 7 balldan asatyn jer silkinisi bolmaıdy», - delingen taratylǵan habarlamada.

Eske salaıyq, bul sońǵy kúnder ishinde Almatyda bolǵan birinshi jer silkinisi emes. 1-2 mamyr kúnderi Almaty qalasy men Almaty oblysynyń aýmaǵynda 8 jerasty dúmpýi tirkelgen bolatyn. 1 mamyr kúni 4 jer silkinisi oryn aldy. Jerasty dúmpýleriniń kindigi Almatynyń soltústik-shyǵysyna qaraı 73-75 shaqyrym jerde boldy. Birinshi dúmpý saǵat 08.31-de, ekinshisi - 13.41-de, úshinshisi - 15.13-te, tórtinshisi 17,37 mınýtta tirkeldi. Jerasty dúmpýleri Almatyda - 4 ball, Taldyqorǵanda -3-4 ball shamasynda sezildi.

2 mamyrda da tórt jer silkinisi boldy. Alǵashqysy - 02.29 -da tirkelip, jerasty dúmpýi Almaty qalasynda 4 ball shamasynda sezildi. Ekinshi dúmpý - 05.27-de, úshinshisi - 05.52-de, tórtinshisi 08.31-de boldy. Jerasty dúmpýleri Almaty qalasynda 2-3 ball shamasynda tirkeldi.

Barlyq 8 jer silkinisiniń kindigi Almaty oblysy Eńbekshiqazaq aýdanyndaǵy Ekpindi aýylynyń tóńireginde boldy.

3 mamyr kúni 17 saǵat 33 mınýtta Almaty oblysy Eńbekshiqazaq aýdanynda K=10,0 energetıkalyq qýatymen taǵy jer silkindi. Jerasty dúmpýleri Molovodnoe kentinde jáne Esik qalasynda MSK-64 baǵany boıynsha 2-3 ball qýatymen baıqaldy. Adam shyǵyny men qıraýlar bolǵan joq.