Búgin Taldyqorǵanda 4 myńnan asa aǵash otyrǵyzyldy
TALDYQORǴAN. QazAqparat - Búgin Taldyqorǵanda 4 myńnan asa aǵash otyrǵyzyldy. Aýqymdy shara «Baq qala» aktsııasy aıasynda júzege asty. Igi iske shahardyń 8 myńnan astam turǵynymen qatar oblys ákimi de at salysty, dep habarlaıdy QazAqparat tilshisi.
Jas emen, shaǵan, qaraǵan, qaıyń, tutqulaq sııaqty aǵash túrleri endi qalanyń saıabaqtaryna, aýlalary men kóshelerine kórik beretin bolady. Tal egý jumystary «Shyǵys» shaǵyn aýdanyndaǵy jańadan jasalǵan «Kóktem» gúlzarynda, Qaratal ózeniniń jaǵalaýynda, «Jastar» saıabaǵynda, qalalyq kóp salaly aýrýhana aýlasynda jáne qalanyń basqa da jerlerinde júrgizildi. Senbilik barysynda Amandyq Batalov qalanyń kórkeıtý jumystaryna erekshe kóńil aýdaryp, qala basshylyǵy men tıisti sala jetekshilerine naqty tapsyrmalar berdi. Máselen, «Kóktem» gúlzaryna gúlder egip, landshaf dızaınymen jumys isteý qajettigin aıtty. Kók ósinderdi sýarý turaqty túrde júrgizilýi qajet. Aǵashty otyrǵyzǵannan keıin onyń kútip-baptaý isine erekshe nazar aýdarylýy tıis.
Bıyl qala aýmaǵyna 6 myń túp aǵash kóshetin egý josparlanǵan. Shahardy kógaldandyrýǵa jáne jasyl jelekti kútip ustaýǵa 75 mln teńgeden astam qarjy qarastyrylǵan.
Aıta ketelik, byltyr bastalǵan «Taldyqorǵan - baq qala» aktsııasy aıasynda qala aýmaǵyna 25 myń túp kóshet egilgen. Onyń 5 myńy alma aǵashy bolatyn. Búginde jemis aǵashtarynyń 75 paıyzy tamyrlanyp, ósip tur.
