Búgin Syr óńirinde ýaqyt beldeýi bir saǵat keıinge shegeriledi
QYZYLORDA. QazAqparat - Búgin Qyzylorda oblysynda ýaqyt 1 saǵatqa keıin shegeriledi. Bul shara jeltoqsannyń 20-synan 21-ine qaraǵan túni saǵat 00:00-den júrgiziledi, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
«Syr óńirinde tabıǵı bıologııalyq ýaqyttan aýytqýshylyq máselesi sońǵy 10 jyl bederinde jıi kóterilip keldi. Túrli ǵylymı-zertteý ınstıtýttary da ómir súrý rıtminiń buzylýy turǵyndardyń densaýlyǵyna teris áser etetinin rastady. Oblysta ýaqytty ózgertýge baılanysty turǵyndar arasynda arnaıy saýalnama júrgizilip, oǵan qatysýshylardyń 70 protsenti ýaqyt beldeýin ózgertý qajet degen pikir bildirgen. Baıqońyr qalasynyń ýaqyty da Qyzylorda oblysymen birge tórtinshi saǵattyq beldeýge sáıkestendiriledi», - dedi Qyzylorda oblysy ákiminiń orynbasary Rýslan Rústemov.
Oblys ákimdiginiń resmı paraqshasynda oblys ákiminiń saǵat beldeýi týraly eki tilde málimdemesi jarııalandy. Sondaı-aq, oblystyq, qalalyq, aýdandyq basylymdarda qaýlynyń tolyq mátini jaryq kórdi. Jergilikti telearnalarda arnaıy beınerolıkter ázirlendi. Aıta keter jaıt, qala mektepterinde sabaqtyń bastalý ýaqyty ózgertilmeıdi.
Búgin Qyzylorda qalasyndaǵy ortalyq alańda atalmysh ýaqyt beldeýin ózgertýge baılanysty arnaıy shara ótkiziledi dep josparlanyp otyr.
Budan buryn Qyzylorda oblysynyń ákimi Qyrymbek Kósherbaev Syr óńirinde ýaqyt beldeýin shegerýge qatysty málimdeme jasaǵan edi.
