Búgin shomylý maýsymy bastalady - QR TJM
ASTANA. 1 maýsym. QazAqparat - Shomylý maýsymy resmı túrde 1 maýsym kúni bastalady. Degenmen keıbir adamdar onyń bastalýyna deıin shomyla bastaıdy.
QR TJM-nen habarlaǵandaı, jyl saıyn sýǵa ketip, kóz jumǵandardyń basym denin arnaıylandyrylmaǵan oryndarda shomylǵandar quraıdy. Paıdalanýǵa berilgen jaǵajaılar aldyn ala tekserilip, onyń ashylýyna daıyndyq júredi. Súńgýirler ózender men basqa da sýlardyń túbin jiti tekserip shyǵady. Tekserýden keıin, jaǵajaıdy tártipke keltirý úshin qolǵa alynýy tıis sharalar boıynsha sheshim qabyldanady. Shomylýǵa daıyndalǵan jaǵajaılarda túnge shomylýǵa qatań tyıym salynǵan.
«Jaǵajaıda medıtsınalyq qyzmetkerler men qutqarýshylar kezekshilik jasaǵanymen, qoıylǵan belgilerden asýǵa bolmaıdy. Budan basqa, qutqarýshylardy sýǵa mas kúıinde shomylǵandar ábigerge salady. Qaza bolǵandardyń 30 paıyzdan astamy jáne qutqarylǵandardyń 70 paıyzdan astamy - mas kúıinde shomylǵan adamdar. Úsh jyl qatarynan jaǵdaı ózgerissiz keledi. Statıstıka boıynsha, sýǵa ketken bes adamnyń úsheýi mas kúıinde boldy.
Jaǵada spırttik ishimdikterdi ishetinder ózderine ǵana emes, aınaladaǵy adamdarǵa da zııan keltiredi. Sýǵa laqtyrylyp, synǵan bótelkeler jaraqattar men basqa da qaıǵyly jaǵdaılardyń jıi sebebi bolýda.
Sý jazda balyq aýlaýshylar úshin de qaýipsiz emes. Balyqshylar ózderimen birge jeke qutqarý quraldaryn, qutqarý keýdeshelerin nemese qutqarý sheńberlerin alyp júrýi tıis.
