Búgin - Shóleıttený men qýańshylyqqa qarsy kúresýdiń dúnıejúzilik kún
ASTANA. 17 maýsym. QazAqparat - Búgin - Shóleıttený men qýańshylyqqa qarsy kúresýdiń dúnıejúzilik kúni.
1995 jylǵy 30 qańtarda Birikken Ulttar Uıymynyń Bas Assambleıasy 1994 jylǵy 17 maýsymdaǵy Shóleıttenýge qarsy kúres jónindegi konventsııasynyń qabyldanýyna baılanysty 17 maýsymdy Dúnıejúzilik shóleıttený men qýańshylyqqa qarsy kúres kúni dep jarııalady.
Shóleıttený - qorshaǵan ortanyń álem boıynsha asa qaýipti kúıreý úderisteriniń biri. Birikken Ulttar Uıymynyń Qorshaǵan orta boıynsha baǵdarlamasy málimetterine saı, planetamyzdaǵy qurlyqtyń tórtten biri shól dalaǵa aınalý qaýpinde eken.
Qýańshylyq shóleıttenýge uryndyrýy múmkin, biraq basty kiná, ádette, adamnyń is-áreketi bolyp shyǵady. Ol - egistik jerlerdi shekten tys óńdeý, maldy beı-bereket jaıý, ormandardy kesip qurtý men nátıjesiz sýlandyrý.
Birikken Ulttar Uıymynyń Bas Assambleıasynyń qarary barlyq memleketterge Dúnıejúzilik shóleıttený men qýańshylyqqa qarsy kúres kúnin shóleıttenýmen jáne qýańshylyqtyń zardaptarymen kúrestegi halyqaralyq yntymaqtastyqqa qatysty konferentsııalardyń, «dóńgelek ústel» májilisteriniń, semınarlar men kórmelerdiń qujattyq materıaldary men uıymdastyrý máselelerin jarııalaý jáne taratý arqyly qoǵamnyń habardarlyǵyn arttyrýǵa arnaýdy usynady.
