Búgin - shilde aıynyń 4-5 qaraǵan túni qasıetti Baraǵat keshi

Óıtkeni, musylmandyq qaınar-kózderde bul keshtiń erekshe rýhanı qundylyqtarmen kómkerilip, berekege toly bolatyndyǵy aıtylǵan. Bul týraly www.muftyat.kz   saıtynda jazyldy.

Bul keshti Islam ǵulamalary «qasıetti kesh», «keshirim keshi», «úkim keshi» dep ataıdy. Rýhanı shýaǵy mol bul qutty keshte musylmandar bar yqylasymen Uly Jaratýshyǵa qulshylyq etip, rýhanı tazarýǵa qatty kóńil bóledi. Jańsaq basqan árbir áreketi úshin Qudaı-Taǵaladan keshirim tileıdi. Aldaǵy kúnderi úshin Alla-Taǵalaǵa jalbarynyp medet suraıdy. Sebebi, salıhaly derekkózderde bul qasıetti keshtegi tilekterdi Haq-Taǵalanyń keıin qaıtarmaıtyndyǵy aıtylǵan. Uly Jaratýshy Quran Kárimnyń Duhan súresiniń birinshi jáne tórtinshi aıattarynda: «Ashyq baıan etýshi Quranǵa sert. Shyn máninde ony qutty bir keshte túsirdik. Rasynda biz eskertýshimiz. Ol keshte barlyq hıkmetti ister aıyrylady» dep buıyrady.

 Bunda aıtylǵan «qutty keshti» bazbir ǵalymdar; «Qadir túni» dese, bazbireýleri «Baraǵat túni» dep joramaldaıdy. Keıbir ǵalymdar bul eki kózqarasty sabaqtastyryp: «Bul túnniń qutty bolýy Quran Kárimniń túsýimen baılanysty. Quran Kárim Shaǵban aıynyń on besinshi juldyzynda (baraǵat keshi) kók júzine túsken. Al, Qadir túninde (Ramazan aıynyń jıyrma jetinshi keshi) Uly Jaratýshynyń buıyrýymen kók júzinen Jebireıil s.ǵ.a arqyly Muhammed s.ǵ.a-ǵa birtindep túsirile bastaǵan» degen pikirdi alǵa tartady. Ǵulamalardyń osy tujyrymynyń negizinde musylman jurtshylyǵy Baraǵat keshiniń rýhanı salmaǵyn qasıetti Qadyr keshinen bir mysqalda kem sanamaıdy.

Islam derek kózderinde qasıetti bul túnde mynandaı bes qundylyqtyń bar ekendigi aıtylady:

Birinshi, Aldaǵy árbir mańyzdy degen ister ılahı tylsym tarapynan osy kúni belgilenedi;

Ekinshi, bul túndegi jasalǵan qulshylyqtardyń ( Quran oqý, namaz, duǵa men zikir, táýbe men ıstıǵfar) kúndizgi jasalǵan qulshylyqtardan saýaby joǵary bolady;

Úshinshi, bul túni Alla-Taǵalanyń nur-berekesi men shuǵylasy tań shapaǵyna deıin tógilip turady;

Tórtinshi, bul túni suralǵan keshirim qabyl bolady;

Besinshi, bul túni ardaqty Paıǵambarymyz s.ǵ.a-ǵa shapaǵat etý quqyǵy berilgen.

Endeshe,  mundaı qasıetti túndi ǵapyldyqta ótkizip almaı Paıǵambarymyzǵa (s.ǵ.s.) kóp salaýat, Allahdan bilip-bilmeı istegen kúnálarymyzdyń keshirilýin tilep (ıstıǵfar), kúndizinde oraza, túninde nápil namazdy kóbirek oqyp, qulshylyqpen ótkizgen durys.

Allah taǵala tilek, ǵıbadattarymyzdy qabyl etsin! Ámın!