Búgin «Shell» kompanııasy men «Qazenerdjı» qaýymdastyǵynyń ókilderi «Shell» kompanııasynyń granttarynyń ıegerlerimen kezdesti

dep habarlaıdy QazAqparat.

Esterińizge sala keteıik, «Shell» kompanııasy «Qazenerdjı» qaýymdastyǵynyń bilim berý baǵdarlamasynyń basty demeýshisi bolyp tabylady jáne atalmysh kompanııa mine birneshe jyldardan beri qaýymdastyqpen birge qyzmet etip, onyń damý baǵdarlamasynyń elimiz úshin barynsha tıimdi ári yqpaldy bolýyna úlken úles qosyp keledi. Kompanııa óziniń granttaryn jeńip alǵan jastardyń 4 jyl boıy elimizdiń jetekshi oqý oryndarynda bilim alýlaryna múmkindik jasap, qajetti shyǵyndardyń barlyǵyn ótep otyrady.

«Qazenerdjı» qaýymdastyǵynyń atqarýshy dırektory Álıakpar Mátishevtiń aıtýynsha, qaýymdastyqtyń bilim berý baǵdarlamasy 4 jyldan beri jumys istep keledi. «Biz baǵdarlama boıynsha munaı, gaz salasynda qyzmet etýge nıet bildirgen, boıynda erekshe daryny bar, biraq áleýmettik jaǵynan múmkindikteri shekteýli jastardy iriktep alamyz. Olar túbinde eldiń ekonomıkasyn dıversıfıkatsııalaý jumystaryna atsalysýlary qajet. Búginde elimizdiń munaı, gaz salasy otandyq bilikti kadrlarǵa zárý bolyp otyr. Sondyqtan biz oqytyp jatqan stýdent jastar elimizdiń munaı, gaz salasyndaǵy adam kapıtalynyń qazaqstandyq úlesin arttyrýǵa eleýli úles qosady degen úmittemiz. Árıne, búgingi stýdenttermen kadrǵa qatysty máselelerdiń barlyǵy sheshilip ketedi dep aıtýǵa bolmas. Biraq biz qolǵa alyp otyrǵan shara úlken istiń bastamasy ǵana. Sondyqtan bolashaq bilikti mamandardyń qatary áli arta beredi degen oıdamyn», dedi atqarýshy dırektor.

Búgingi kezdesýge «Qazenerdjı» qaýymdastyǵynyń bilim baǵdarlamasy negizinde elimizdiń joǵary oqý oryndarynda bilim alyp jatqan 13 stýdent qatysty. Sharanyń maqsaty stýdent jastardyń «Shell» kompanııasy men «Qazenerdjı» qaýymdastyǵynyń qyzmeti men jumystary jóninde keńirek maǵlumat alyp, atalmysh ujymdardyń basshylyǵymen tildesip, ózderiniń qarym-qabiletterin tanytyp, kózqarastarymen bólisý bolyp otyr. Shara barysynda olar «Shell» kompanııasynyń ǵımaratyn aralap, túrli oıyn-saýyq baǵdarlamalaryna qatysatyn bolady. Kompanııa ókilderi ózderi uıymdastyratyn oıyndar men jarystardyń jeńimpazdaryna arnap, syılyqtaryn da daıyndap qoıǵan.