Búgin Shekara áskeriniń qurylǵan kúni
ASTANA. 18 tamyz. QazAqparat - Búgin Qazaqstan Respýblıkasy Shekara áskeriniń qurylǵan kúni. 1992 jylǵy tamyzdyń 18-indegi Qazaqstan Respýblıkasy Prezıdentiniń Jarlyǵyna sáıkes Shyǵys shekara okrýgi negizinde Qazaqstan Respýblıkasy Shekara áskeri quryldy.
Biraq resmı data Qazaqstannyń memlekettik merekeleri kúntizbesinde 2012 jylǵy 29 tamyzda ǵana paıda boldy.
Aýqymynda eldiń egemendigi men táýelsizdigin keń kólemdi túrde júzege asyra alar aýmaǵy men shekarasy bolýy memlekettiń negizgi belgisi bolyp tabylady. Bul sol memlekettiń qaýipsizdigi men aýmaqtyq tutastyǵyn qamtamasyz etetin Shekaralyq qyzmettiń aıryqsha mańyzyn aıqyndaıdy.
Shekara qyzmetiniń basty mindetterine:
Qazaqstan Respýblıkasynyń memlekettik shekarasyn, onyń memlekettik shekaradaǵy aýmaqtyq tutastyǵy men ekonomıkalyq múddelerin kúzetý jáne qorǵaý;
Respýblıkanyń memlekettik shekara týraly zańdaryn saqtaýdy qamtamasyz etý jáne memlekettik shekaranyń rejimderi máseleleri jónindegi Qazaqstan Respýblıkasynyń halyqaralyq sharttar men kelisimderden shyǵatyn mindetterdi oryndaý;
Qazaqstan Respýblıkasynyń memlekettik shekaradaǵy qorǵanysy men qaýipsizdigi mindetterin oryndaýǵa qatysý;
Qazaqstan Respýblıkasynyń quqyq qorǵaý, tabıǵatty qorǵaý organdarynyń shekara syzyǵyndaǵy azamattar, tabıǵat baılyqtary men qorshaǵan ortany qorǵaýǵa kómektesý jatady.
Qazaqstannyń memlekettik shekarasy 14 myń shaqyrymnan astam qashyqtyqty alyp jatyr.
