Búgin shahmattan «Halyqaralyq grossmeıster Dármen Sádýaqasov kýbogy» týrnıri bastalady
NUR-SULTAN. QazAqparat - Búgin saǵat 15:00-de lichess.org oıyn alańynda «Halyqaralyq grossmeıster Dármen Sádýaqasovtyń Kýbogy» balalar shahmat onlaın-týrnıri bastalady, dep habarlaıdy QazAqparat «Báıterek» ulttyq basqarýshy holdıngi» AQ baspasóz qyzmetine silteme jasap.
Jarysty «Báıterek» UBH» AQ, Dármen Sádýaqasov shahmat akademııasy jáne «Bolashaq» Qaýymdastyǵy uıymdastyrady.
«Báıterek» holdınginiń Basqarma tóraǵasy Aıdar Áriphanov týrnırdiń qatysýshylaryna arnaıy beıne habarlama jazdy.
«Biz otandyq shahmatty damytýǵa úles qosyp, balalarymyzǵa jańa jaǵdaılarǵa beıimdelýge kómekteskenimizge qýanyshtymyz. Pandemııa kezeńinde onlaın-formattar qazaqstandyq mekteptiń halyqaralyq arenadaǵy pozıtsııasyn nyǵaıtýdyń jalǵyz qaýipsiz tásili bolatyny anyq. Dármen Sádýaqasov Kýbogyna qatysýshylar bizdiń chempıondarymyzdyń jeńisti dástúrlerin jalǵastyrady dep úmittenemiz», - dep atap ótti holdıng basshysy.
Sondaı-aq, qazaqstandyq jas talanttarǵa otandyq sport juldyzdary - bokstan Olımpıada chempıony Ermahan Ybraıymov, aýyr atletıkadan tórt dúrkin álem chempıony Ilıa Ilın, MMA, karate jáne djıý-djıtsýdan tórt dúrkin álem chempıony Aıdar Mahmetov, kórkem gımnastıkadan Azııa jáne Azııa oıyndarynyń chempıony Anna Alıabeva jáne halyqaralyq grossmeıster, 20 jasqa deıingi álem chempıony Dármen Sádýaqasov aqjarma tilekterin bildirdi.
Budan basqa, shahmattan 14-shi álem chempıony Vladımır Kramnık (Reseı) jáne shahmat Álem Kýbogynyń jeńimpazy, álem chempıony ataǵyna úmitker Borıs Gelfand (Izraıl) qazaqstandyq daryndarǵa ózderiniń beıne quttyqtaýlaryn joldady.
Kýbokqa qatysýǵa elimizdiń barlyq aımaqtarynan 900-ge jýyq jas shahmatshy ótinim berdi.
Olar úsh jas sanaty boıynsha bólinedi.
2010 jyly týǵan jáne odan kishi uldar men qyzdar arasyndaǵy «A» týrnıri;
2006-2009 jyldary týǵan uldar men qyzdar arasyndaǵy «V» týrnıri;
2002-2005 jyldary týǵan jasóspirimder men qyzdar arasyndaǵy «S» týrnıri;
Matchqa qatysty komıssııanyń formaty, sharttary, tóreshiligi jáne jumysy týraly aqparatty jarys erejelerinen bilýge bolady.
Aıta ketken jón, Dármen Sádýaqasov shahmat akademııasy 2016 jyldan bastap jumys isteıdi. Akademııanyń mindeti - jas shahmatshylardy kásibı daıarlaý, daryndy jastardy damytý, Qazaqstanda shahmatty tanymal etý, respýblıkalyq jáne halyqaralyq jarystar ótkizý. Osy jyldar ishinde Akademııanyń júzdegen oqýshylary joǵary sporttyq nátıjelerge qol jetkizdi, olardyń kópshiligi eldegi jáne sheteldegi túrli bedeldi týrnırlerdiń jeńimpazdary men júldegerleri boldy.
