Búgin Serik Ahmetovti bostandyqqa shyǵarý týraly qaýly kúshine enedi
QARAǴANDY. QazAqparat -Qazaqstannyń eks-premer-mınıstri Serik Ahmetovtiń naqty jaza merzimin bas bostandyǵyn shekteý jazasyna aýystyrý týraly Qaraǵandy oblysy Abaı aýdandyq sotynyń qaýlysyna apellıatsııalyq shaǵym túspegendikten, sot sheshimi zańdy kúshine endi, dep habarlaıdy QazAqparat tilshisi.
Prokýratýra Ahmetovti bostandyqqa shyǵarý týraly sheshimmen kelisip, qarsy shaǵym túsirmedi. Sondaı-aq prokýrorlar naqty jaza merzimin bas bostandyǵyn shekteý jazasyna aýystyrý máselesi qaralǵan 5 qyrkúıek kúngi sot protsesi barysynda sottalýshy Ahmetovtiń ótinishine de qoldaý bildirgen bolatyn.
21 qyrkúıek kúni tańerteń sot qaýlysy shuǵyl túrde oryndalý úshin Qylmystyq-atqarý júıesi departamentiniń Abaı aýdany Qarabas kentinde ornalasqan AK 159/18 kolonııasynyń ákimshiligine tapsyrylady.
Ahmetov 2016 jyldyń 11 maýsymy kúni jaqsy tártibi jáne mekeme qabyrǵasynda tárbıelik sharalarǵa belsendi qatysqany úshin jazany óteýdiń jeńildetilgen túrine kóshirilgen bolatyn.
2017 jylǵy 5 qyrkúıekte burynǵy Úkimet basshysyna jazanyń ótelmegen 4 jyl 26 kúni osyndaı merzimge bas bostandyǵyn shekteý jazasyna almastyryldy . Serik Ahmetov bul merzimdi turǵylyqty jeri boıynsha óteıdi.
Eske salaıyq, 2015 jyldyń 11 jeltoqsanynda Qaraǵandy oblysynyń qylmystyq ister jónindegi mamandandyrylǵan aýdanaralyq soty burynǵy premer-mınıstr S. Ahmetov pen basqa da tulǵalarǵa qatysty is boıynsha úkim shyǵardy.
Úkimge sáıkes, burynǵy S. Ahmetov QR QK-niń 176-babynyń 4-bóliginiń «b» tarmaǵy (senip tapsyrylǵan bóten múlikti ıelenip alý nemese ysyrap etý), QR QK-niń 310-babynyń 3-bóligi (kásipkerlik qyzmetke zańsyz qatysý), QR QK-niń 307-babynyń 3-bóligi (qyzmet ókilettigin teris paıdalaný), QR QK-niń 310-1-babynyń 3-bóligi (zańdy kásipkerlik qyzmetke kedergi keltirý) boıynsha kináli dep tanyldy. Oǵan 10 jyl merzimge bas bostandyǵynan aıyrý jazasy taǵaıyndaldy, sondaı-aq oǵan múlkin tárkileý jáne memlekettik organdarda laýazymdy qyzmet atqarý quqyǵynan 5 jylǵa aıyrý belgilendi. S.Ahmetov sot zalynda qamaýǵa alyndy.
Qaraǵandy oblystyq sotynyń qylmystyq ister boıynsha apellıatsııalyq soty 2016 jyldyń 14 naýryzynda jemqorlyq qylmystyq iske qatysty sotty bolǵan 11 adamnyń jazasyn jeńildetti. Sonyń ishinde Serik Ahmetovtiń jazasy 10 jyldan 8 jylǵa deıin azaıtyldy.
Qaraǵandy oblysynyń Abaı aýdandyq soty 2017 jyldyń 19 qańtarynda Ahmetovke qatysty«QR Táýelsizdiginiń 25 jyldyǵyna oraı raqymshylyq jasaý týraly» QR Zańyna sáıkes raqymshylyq jasap, onyń jazasynyń ótelmegen tórtten bir bóligin 1 jyl 7 aı 11 kúnge qysqartty.
