Búgin Senattyń Áleýmettik-mádenı damý komıtetinde «Neke (erli-zaıyptylyq) jáne otbasy týraly» kodeks jobasy qaraldy
TANA. 30 qyrkúıek. QazAqparat - Búgin Senattyń Áleýmettik-mádenı damý komıtetinde «Neke (erli-zaıyptylyq) jáne otbasy týraly» kodeks jobasy qaraldy,dep habarlaıdy baspasóz qyzmeti.
Osy jobada nekeni qııýdyń, toqtatýdyń, ony jaramsyz dep tanýdyń sharttary men tártibi aıqyndalǵan. Erli-zaıyptylardyń, balanyń (balalardyń), ata-analardyń, bala asyrap alýshylardyń quqyqtary men mindetteri naqtylandy. Balany asyrap alýdyń tártibi, qorǵanshylyq pen qamqorshylyqty retteý máseleleri reglamentteldi. Otbasy músheleriniń, erli-zaıyptylardyń, burynǵy erli-zaıyptylardyń jáne otbasynyń basqa da músheleriniń alımenttik mindettemeleri bekitildi.
Qazaqstan Respýblıkasynyń neke-otbasy zańnamasy normalarynyń sheteldikterge jáne azamattyǵy joq adamdarǵa qoldanylý erekshelikteri aıqyndaldy.
Kodeks jobasyna birqatar jańa erejeler de bar: sýrrogat ana bolý jáne urpaqty bolýdyń qosalqy ádisteri men tehnologııalaryn qoldaný máselelerin retteıtin normalar engizildi; balalar mekemeleriniń kútip-baǵýynda bolatyn kámeletke tolmaǵan qamqorlyqqa alynýshylardyń múlkin qorǵaý máseleleri naqtylandy; bala asyrap alý jónindegi agenttikterdi akkredıtteý normalary kodıfıkatsııalandy; memlekettik organdardyń azamattyq hal aktilerin tirkeýiniń tártibi retteldi.
Zań jobasyn Senatta talqylaý barysynda oǵan ózgerister men tolyqtyrýlar engizý qajettigi týyndady.
Atap aıtqanda, Qazaqstan Respýblıkasynyń sheginen tys jerde turaqty turatyn Qazaqstan Respýblıkasy azamattarynyń jáne sheteldikterdiń bala asyrap alýynyń tártibi Balalardy qorǵaý jáne balany sheteldik asyrap alýǵa qatysty yntymaqtastyq týraly konventsııaǵa sáıkes keltirildi.
Sheteldik bala asyrap alýshylardyń asyrap alynǵan balalardyń tirshilik jaǵdaıy, oqýy jáne densaýlyǵynyń jaı-kúıi týraly esepter usynýynyń tártibi reglamentteldi.
Bala asyrap alý jónindegi agenttikterdi akkredıtteý, sondaı-aq olardy akkedıtteý týraly sheshimniń qoldanysyn toqtata turý jáne merziminen buryn toqtatý bóligindegi normalar naqtylandy.
Budan basqa, Kodeks jobasynyń normalaryn qoldanystaǵy zańnamaǵa sáıkes keltiretin, sondaı-aq naqtylaý jáne redaktsııalyq sıpattaǵy birqatar túzetýler engizildi.
Zań jobasy palatanyń qaraýyna jiberildi.
