Búgin saılaý úderisine qatysýshylardan shaǵymdar men ótinishter kelip túsken joq - QR OSK
«Búgin elimizdiń barlyq óńirinde QR Parlamenti Senatynyń depýtattaryn saılaý boıynsha daýys berý ótýde. Daýys berý bıýlletenderine QR Parlamenti Senatynyń depýtattyǵyna tirkelgen 39 kandıdattyń tegi engizildi. Astana ýaqytymen saǵat 11-degi jaǵdaı boıynsha tańdaýshylardyń barlyq otyrystary ashyldy», - dedi ol.
M. Sársembaevtyń sózine qaraǵanda, aldyn ala málimetterge sáıkes tańdaýshylardyń kelýi óńirler boıynsha mynandaı: Astana- 100 paıyz, Almaty-97,1 paıyz, Aqmola oblysy-98,9, Aqtóbe oblysy-98,5, Almaty oblysy-99,1 paıyz, Qaraǵandy oblysy-99 paıyz, Qostanaı oblysy - 98,6 paıyz, Mańǵystaý oblysy - 100 paıyz, sondaı-aq Soltústik Qazaqstan oblysynda 97,6 paıyz deńgeıinde.
«Saılaý komıssııalary men jergilikti bılik organdary qaýipsizdik pen tártip saqtaýdy qamtamasyz etý boıynsha barlyq sharalardy qabyldady. Saılaý zańnamasynyń normalaryn buzý faktisi tirkelgen joq. Ortalyq saılaý komıssııasyna jáne Astana men Almaty, sondaı-aq oblystyq saılaý komıssııalaryna búgin saılaý úderisine qatysýshylardan, azamattar men uıymdardan shaǵymdar men ótinishter kelip túsken joq», -dedi ol.
Aıta keteıik, kúntizbelik josparǵa sáıkes, 29 qyrkúıek, 24.00-de úmitkerlerdiń saılaýaldy úgit-nasıhat jumystary aıaqtaldy. Úgit-nasıhat sharasynyń aıasynda saılaýshylarmen 11-29 qyrkúıek aralyǵynda aımaqtarda 266 kezdesý ótti. 30 qyrkúıekte, sonymen birge daýys berý kúni - 1 qazanda kez kelgen saılaýaldy úgit-nasıhatqa tyıym salyndy.
Saılaý zańnamasynyń talabyna sáıkes qazirgi ýaqytta tańdaýshylardyń barlyq tizimi jergilikti buqaralyq aqparat quraldarynda jarııalandy. Tańdaýshylardyń birlesken otyrysy eger oǵan oblystyń barlyq máslıhattarynan saılanǵan depýtattardyń 50 paıyzdan astamy qatyssa zańdy bolyp sanalady.
