Búgin «Saltanat» bı ansambli elordalyq áıelderge arnap kontsert beredi
ASTANA. 3 naýryz. QazAqparat - Búgin Astanadaǵy Kongress-holl saraıynda Memlekettik «Saltanat» bı ansambli 8 naýryz - Halyqaralyq áıelder kúnine oraı úlken merekelik kontsert beredi.
«Kontserttik baǵdarlamaǵa qazaqtyń jáne álem halyqtarynyń bıleri engizilgen. Sondaı-aq, kórermender nazaryna Bolat Jandarbekov shyǵarmasynyń jelisi boıynsha «Saltanat» bı ansambliniń kórkemdik jetekshisi, QR eńbek sińirgen qaıratkeri Gúlsáýle Orymbaevanyń «Tomırıs» baletinen úzindi usynylady», - dep jazylǵan buqaralyq aqparat quraldaryna taratylǵan habarlamada.
Sonymen qatar, kontsertke Qazaqstannyń halyq ártisi Tuńǵyshbaı Jamanqulov pen folklorly-etnografııalyq «Turan» ansambli qatysady.
«Saltanat» ansambli 1955 jyldyń 5 tamyzynda Qazaq KSR Memlekettik bı ansambli bolyp quryldy. Mýzyka, vokal men horeografııa ónerin damytýdaǵy orasan eńbegi úshin jáne joǵary dárejedegi oryndaý sheberligi úshin Qazaq KSR Joǵary Keńes Prezıdıýmynyń Úkimimen 1967 jyly ansamblge «Eńbek sińirgen» degen qurmetti ataq berildi.
1989 jyldyń 20 aqpanynda QazKSR Án jáne bı ansambli QR Memlekettik «Saltanat» bı ansambli bolyp qaıta quryldy.
«Saltanat» ansambliniń qazirgi tańdaǵy shyǵarmashylyq damý kezeńinde Qazaqstan halyqtary bıleriniń san alýan túrlerin jáne álem halyqtarynyń horeografııalyq mádenıetin qamtıtyn repertýary 150 nómirden asady.
Qazirgi tańda «Saltanat» bı ansambli ulttyq horeografııa mádenıeti men álem horeografııasynyń san alýan baı murasyn tolyqqandy dáripteıtin biregeı kásibı bı ujymy bolyp tabylady.
