Búgin - Rojdestvo merekesi
ASTANA. 7 qańtar. QazAqparat - Búgin - álem pravoslavtarynyń eń basty meıramy - Rojdestvo merekesi. Iısýs-Isa paıǵambardyń týǵan kúni búginde álemniń kóptegen elderinde memlekettik mereke retinde atalyp ótedi.
Eýropanyń kóptegen elderinde jáne AQSh-ta bul kún otbasy merekesi retinde úlken qýanyshpen keń aýqymda ótedi. 2005 jyldan beri QR Eńbek kodeksine sáıkes, pravoslav rojdestvosy elimizde Qurban Aıt merekesi sııaqty demalys kúni bolyp jarııalandy. Elimizdiń barlyq hramdary men shirkeýlerinde Rojdestvo qulshylyq jáne ǵıbadat rásimderimen qańtardyń 6-synan 7-si kúnine qaraǵan túnde bastaldy. Mereke kezinde dos-jaran, týma-týys bir-birin izgi nıetpen quttyqtap, barsha jan meıirimdilik tanytyp, joq-jitik adamdarǵa qaıyr-sadaqa taratyp, qamkóńil jandardy qýantyp, jetimderge tartý-taralǵylar jasaǵan jón dep sanaıdy. Sonda ǵana qudaıdyń shapaǵatyna bólenedi degen nanym bar. Ǵasyrlar boıy qazaqtyń darhan dalasynda túrli mádenıet, din men salt-dástúrdi ustanatyn san-alýan halyqtardyń taǵdyry ushtasyp jatty. Sonyń nátıjesinde qazir qazaq halqymen birge bir shańyraq astynda 140 etnos pen 40 konfessııa ókilderi beıbit ǵumyr keshýde. Uzaq ýaqyt kórshiles ómir súrgen halyqtarda bir-birine degen turaqty shydamdylyq pen bir-birine qurmet dástúri qalyptasqan.
Rojdestvo - izgi úmitter men jaqsylyqtardyń merekesi. Ol adamdardy ıgi ister jasaýǵa, qudaıdyń ósıetimen beıbitshilik pen kelisimde ómir súrýge umtylýda bastaryn biriktiredi. Osy máńgilik qundylyqtar, ásirese, túrli senimdegi jáne etnostaǵy adamdar dostyq aýanynda ómir súretin Qazaqstanda erekshe qurmetteledi.
