Búgin respýblıkanyń keıbir aımaqtaryna qar jaýady
ASTANA. QazAqparat - Respýblıka aımaǵynyń basym bóliginde aýa raıy turaqsyz bolady. Keı jerlerge qar túsip, ońtústik-batys pen ońtústikte jáne ońtústik-shyǵysta jaýyn-shashynsyz. Keı jerlerde tuman túsip, kóktaıǵaq bolyp, jel kúsheıedi, dep habarlaıdy QazAqparat.
«Qazgıdromet» RMK málimetterine qaraǵanda, Qostanaı oblysynda kúndiz de túnde de kóktaıǵaq bolyp, jeldiń kúshi sekýndyna 15-20 metrge deıin kúsheıedi. Jekelegen aýdandarda tuman túsedi.
Aqmola, Soltústik Qazaqstan, Shyǵys Qazaqstan oblystarynyń birqatar aımaqtarynda tuman túsip, kóktaıǵaq bolady, jeldiń kúshi 15-20 metrge jetedi. Batys Qazaqstan oblysynyń keı jerlerinde tuman, kóktaıǵaq bolady. Jeldiń kúshi 15-20 metr/sekýndqa jetedi. Pavlodar oblysynda, túnde Qaraǵandy oblysynda jeldiń kúshi 15-20 metr bolady.
Qyzylorda oblysynyń keı jerlerinde tuman túsip, kúndiz 15-20 metr/sekýnd jyldamdyqpen jel soǵady. Jambyl, Ońtústik Qazaqstan, Mańǵystaý, Atyraý oblystarynyń keı jerlerine tuman túsedi. Kúndiz Aqtóbe oblysynda kóktaıǵaq bolady. Almaty oblysynyń Jalańashkól aımaǵynda jeldiń kúshi 15-20 metrge jetedi dep boljanýda.
