Búgin respýbıkanyń kóptegen óńirlerinde kún ystyq bolyp, joǵary órt qaýpi saqtalady

ASTANA. QazAqparat - Qazaqstannyń basym bóliginde atmosferalyq aǵyndardyń ótýimen ótkinshi jańbyr jaýyp, naızaǵaı oınaıdy, jel kúsheıedi, ońtústikte, ońtústik-shyǵysta jáne shyǵysta ǵana kún ashyq bolyp, burynǵysha ystyq aýa raıy kútiledi, dep habarlady QR TJM «Qazgıdrometke» silteme jasap.

Aqmola, Atyraý, Batys Qazaqstan, Aqtóbe, túnde Soltústik Qazaqstan, kúndiz Qyzylorda, Mańǵystaý, Qostanaı, Pavlodar, Qaraǵandy oblystarynda keı jerlerde jel 15-20 m/s-qa deıin kúsheıedi.

Kúndiz Almaty, Qyzylorda, Atyraý, Pavlodar oblystarynda, Qostanaı oblysynyń keı jerlerinde kúshti ystyq bolady. Jambyl, Qaraǵandy oblystarynda óte kúshti ystyq, keı jerlerde aptap ystyq bolady. Respýblıkanyń ońtústiginde, batysynyń keı jerlerinde, soltústik-batysynda, soltústiginde, ońtústik-shyǵysynda jáne ortalyǵynda óte joǵary órt qaýpi saqtalady.