Búgin Reseıde Aza tutý kúni - Permdegi oqıǵa
ASTANA. Jeltoqsannyń 7-si. QazAqparat - Reseı Prezıdenti Dmıtrıı Medvedev Permdegi órtke baılanysty jeltoqsannyń 7-sin Reseıde Aza tutý kúni dep jarııalaý týraly jarlyqqa qol qoıdy.
Permde túngi klýbtardyń birinde bolǵan órttiń saldarynan 100-den astam adamnyń opat bolǵanyn QazAqparat budan buryn habarlaǵan edi.
Qaıǵyly oqıǵanyń sebebin tekserý sharalary jalǵasýda - tergeýdiń pikiri boıynsha, «Hromaıa loshad» túngi klýbyndaǵy órtke jabyq jaıda qoldanýǵa tyıym salynǵan otshashýdyń qoldanylýy men jaıdy bezendirý kezinde órt qaýipsizdigi erejeleriniń dóreki buzylýy sebep bolǵan.
Órt oqıǵasy boıynsha RF Qylmystyq kodeksiniń 109-shy baby 3-shi tarmaǵy boıynsha - abaısyzda eki jáne odan da kóp adamǵa ólim ákelgeni úshin jáne 219-shy baptyń 3-shi tarmaǵy - eki jáne odan da kóp adamnyń ólimine ákelgen órt qaýipsizdigi erejeleriniń buzylý fakti boıynsha qylmystyq is qozǵalyp otyr.
Esterińizge sala keteıik, Perm klýbynda bolǵan órttiń saldarynan 111 adam qaza bolyp, taǵy 120-dan astam adam jaralanǵan edi. Aýyr jaǵdaıda jatqan jaralylar arnaıy reıstermen Máskeý, Peterbor, Chelıabi qalalarynyń emhanalaryna jetkizildi.
