Búgin Reseı fýtbolshylarynyń ÁCh-daǵy taǵdyry sheshiledi

Reseı tarıhta Ispanııany jeńip kórgen emes. Buǵan deıin ótkizilgen ózara kezdesýlerdiń beseýinde ıspandar jeńiske jetken. Biraq bıylǵy chempıonatta Reseı eń kóp gol soǵatyn komandalardyń qatarynda tur. Toptyq kezeń aıasyndaǵy úsh oıynda qarsylastar qaqpasyna 11 ret týra soqqy baǵyttap, sonyń segizi golmen aıaqtalǵan. Bul olardyń A tobynda ekinshi oryn ıelenýine jol ashty. Týrnır qojaıyndaryna bul jaǵynan, tipti, azýly degen Ispanııanyń ózi tańdaı qaǵatyndaı. Olar V tobynda birinshi oryn alǵanmen, qarsylastar qaqpasyna dál baǵyttalǵan 12 soqqysynyń teń jartysy ǵana golǵa aınalǵan.

Reseı quramasy ózara kezdesýlerde Ispanııany jeńip kórmese de, qazirgi bas bapkeri Stanıslav Cherchesov pıreneılikterdiń bas bapkeri Fernando Ierrodan basym túsken jeri bar. Oıyn aldynan ótkizilgen baspasóz konferentsııasynda Cherchesov sonaý 1991 jyly «Spartak» «Real Madrıd» komandasyn jeńgen oıyndy eske aldy. «Men kezinde Ierroǵa qarsy oınaǵanmyn. Onyń «Santıago Bernabeý» stadıonynda meniń qaqpamnyń oń jaq buryshyna tepken pármendi soqqysy áli esimde. Sol soqqyny qaıtaryp edim. Aıtpaqshy, biz sol oıynda jeńiske jettik... Qazir eki komandanyń da jaýapkershiligi asa joǵary. Oıynnan soń eshnárseni ózgertýge bolmaıdy», - dedi ol.

Ispanııa bas bapkeri Fernando Ierro reseılikterdiń bıik boıly oıynshylaryna nazar aýdardy. «Reseıdiń myqty oıynshylary kóp, olardyń keıbiriniń boıy bıik. Olardyń oıynynda ártúrlilik bar. Olardyń osal tusyn taýyp, sol jerine soqqy berý kerek. Bıylǵy chempıonatta olar birshama basqasha oınap júr. Reseılikterdiń bapkerinen kez kelgen nárseni kútýge bolady. Olar taktıkany ózgertýi múmkin. Alań ortalyǵynda pressıng jasaýy nemese kóp kúshpen shabýyldaýy múmkin. Men Cherchesovtyń ne ázirlep otyrǵanyn bile almaımyn», - deıdi Ierro.

«Qyzyl fýrııa» degen atpen tanylǵan ıspandardyń gol soqqysh komanda ekeni belgili. Ázirge olar álem chempıonattary tarıhynda 98 gol soqqan. Taǵy eki gol pıreneılikterdi 100 jáne odan kóp gol soqqan Brazılııa, Germanııa, Argentına, Italııa jáne Frantsııa quramalarynyń qataryna qosady. Ispanııanyń qazirgi áleýetin eskersek, aldaǵy oıynda osy nátıjege jetýine senýge bolady. Degenmen, olardyń aldynda birneshe qıyndyqtar bar. Sonyń biri - aýa raıy. Búgin kúni boıy Máskeýde jańbyr sebelep tur. Jergilikti ýaqytpen 17:00 shamasynda aýa temperatýrasy 23-25 gradýs ystyq bolyp, ylǵaldylyǵy 90 paıyzǵa deıin artýy múmkin.

Aıta keteıik, osy oıynnyń jeńimpazy shırek fınalda Horvatııa - Danııa oıynynda jeńiske jetken komandamen kezdesedi.

Oıyndy Astana ýaqytymen 20:00-den bastap Qazaqstan jáne Qazsport telearnalary tikeleı efırden kórsetedi.

1/8 fınaldyń qalǵan oıyndarynyń tolyq kestesin myna jerden kórýge bolady.