Búgin Parlament Senaty depýtattarynyń saılaýy ótedi

Ortalyq saılaý komıssııasynyń tóraǵasy Qýandyq Turǵanqulovtyń aldyn ala málim etkenindeı, Senat depýtattarynyń saılaýy tańǵy saǵat 10. 00-de jáne 11. 00-de bastalady. OSK tóraǵasy saılaýdyń bastalý ýaqytynyń ártúrli bolýyn elimizdiń aımaqtarynda

ýaqyt aıyrmashylyǵy bar ekendigimen túsindirip otyr. Senat depýtattarynyń saılaýy máslıhat depýtattarynyń jıyny retinde ótedi. Oǵan barlyq deńgeıdegi máslıhat depýtattary qatysady. Búginde elimizde barlyǵy 3 myń 335 depýtat bolsa, olardyń 3 myń 328-i qatysady dep kútilýde. Ózge depýttardyń oryndary túrli sebeptermen bos tur.

OSK tóraǵasynyń málimetteri boıynsha Senat depýtattary saılaýynyń alǵashqy qorytyndylary búgin jumys kúniniń aıaqtalýyna taman shyǵady. Al tolyq qorytyndyny OSK-nyń ókilderi 22-shi tamyz kúni OSK-nyń otyrysynda jarııa etedi. Senat depýtattarynyń saılaýyna kandıdat retinde 39 adam tirkelgen. Olar 16 oryn úshin saıysqa túsedi. Saılaýshylardyń keminde 50 paıyzdan astam daýsyn jınaǵan kandıdattar saılaýda jeńiske jetken bolyp esepteledi.

Keshe Q.Turǵanqulov Ortalyq saılaý komıssııasy men onyń aımaqtaǵy ókildikteri Senat depýtattarynyń saılaýyn ótkizýge 100 paıyz daıyn ekendigin málimdedi. «Biz Senat depýtattarynyń saılaýyn ótkizýmen aınalysatyn aımaqtaǵy ókildikterden aqparattardy aldyq. Olar saılaý ótkizýge tolyq daıyn. Saılaýdyń bastalatyn ýaqyty da belgilendi. Saılaýdy ótkizýge qajetti oryndar bar jáne olardyń barlyǵy talapqa saı jaraqtalǵan. Al saılaýdy uıymdastyrýshy negizgi organ retinde biz saılaýmen baılanysty sharalardyń barlyǵyn qarjylandyryp, materıaldyq qajettiliktermen qamtamasyz ettik»,-dedi OSK tóraǵasy.