Búgin Parlament kitaphanasy ashyq esik kúnin ótkizýde

dep habarlaıdy QazAqparat.

Parlament kitaphanasy 1991 jyly Joǵarǵy Keńes kezinde qurylǵan. Kitaphananyń basty maqsaty - Senat jáne Májilis depýtattaryn, qos Palatanyń apparat qyzmetkerlerin zań-quqyqtyq, qoǵamdyq-saıası, áleýmettik-ekonomıkalyq qujattarmen, materıaldarmen qamtamasyz etý. Sheteldik áriptesterimen de tyǵyz baılanys jasap turady.

Memleket basshysynyń ishki jáne syrtqy saıasattaǵy qyzmeti, Qazaqstannyń halyqaralyq deńgeıdegi bedeli jaıly jaryq kórgen basylymdar men jınaqtar kórmege qoıylǵan. Sondaı-aq «Qazaqstan jáne EQYU» taqyrybymen maqalalar men kitaptar kórermen nazaryna usynylǵan. Kitaphanada jańadan shyǵyp jatqan jurnaldar men kitaptar tanystyrylýda.

Bul sharany QR Parlamenti Májilisi Apparatynyń aqparattyq-taldaý bólimi uıymdastyryp otyr. Osy bólimniń jetekshisi Indıra Mamashevanyń aıtýynsha, kitaphana qoryn tolyqtyrý maqsatynda Reseı Federatsııasy Memlekettik Dýmasynyń kitaphanasymen, Reseı Ǵylym Akademııasynyń Memleket jáne quqyq ınstıtýtymen, Reseı Úkimeti janyndaǵy Zańnama jáne salystyrmaly quqyqtaný ınstıtýtymen, sondaı-aq TMD elderiniń birqatar parlamenttik kitaphanalarymen tyǵyz baılanys ornatylǵan. «Biz shetel Parlamentterindegi kitaphanalardan sol elderdiń jańa zańdaryn, quqyqtyq saladaǵy basylymdaryn aldyramyz. Óz kezeginde Qazaqstannyń jańadan qabyldap jatqan zańdaryn shetel Parlamentterine jiberip otyramyz»,- dedi Indıra Beısembekqyzy.

Qazir kitaphana qorynda 30 myńnan astam kitaptar men merzimdi basylymdardyń qory bar. Onyń ishinde kitaptardyń úlesi 13 myńnan asady. 16 myńnan astamy - gazetter men jurnaldar. Kitap qorynda parlamentarızm, memleket jáne quqyq, ekonomıka, tarıh, saıasat, fılosofııa jáne basqa salalar boıynsha ǵylymı jáne oqýlyq basylymdar saqtalǵan. Anyqtamalyq-saraptamalyq materıaldar da óte kóp.

«Bizdiń kitaphanadan depýtattar men Apparat qyzmetkerleri Qazaqstan men kóptegen sheteldiń zańdaryn qaǵazǵa basylǵan túrinde jáne elektrondyq  nusqasynda alýyna bolady. Til úırenemin degen adamdarǵa qazaq, aǵylshyn tilin meńgerýge járdemdesetin elektrondyq  túrdegi kómek quraldary da bar»,- deıdi Májilis Apparaty aqparattyq-taldaý bóliminiń sektor meńgerýshisi Yrys Kárimova.