Búgin - Otbasy kúni
ASTANA. QazAqparat - Búgin - Otbasy kúni. 2013 jyly Qazaqstan Respýblıkasynyń Prezıdenti Nursultan Nazarbaevtyń «Qazaqstan Respýblıkasyndaǵy kásiptik jáne ózge de merekeler týraly» Zańǵa ózgertýler engizý jónindegi Jarlyǵyna sáıkes, qyrkúıek aıynyń ekinshi jeksenbisi - Otbasy kúni bolyp bekitilgen bolatyn. Dál sol jyly 8 qyrkúıekte Qazaqstanda tuńǵysh ret Otbasy kúni merekesi atalyp ótken edi.
2014 jyly 5 naýryzda «Mereıli otbasy» ulttyq konkýrsy týraly» Qazaqstan Respýblıkasy Prezıdentiniń 2013 jylǵy 6 jeltoqsandaǵy №250 ókimi 4-tarmaǵynyń 1) tarmaqshasyn iske asyrý maqsatynda Qazaqstan Respýblıkasynyń Úkimeti «Mereıli otbasy» ulttyq konkýrsyn ótkizý qaǵıdalaryn bekitý týraly qaýly shyǵarǵan bolatyn jáne ol resmı BAQ-ta jarııalanǵan edi. Osy jyldan bastap qoǵam nazaryn otbasylyq qundylyqtardy saqtaýǵa aýdarý ári ony dáripteý maqsatynda «Mereıli otbasy» ulttyq konkýrsy ótkizilip keledi. Bul elimizde memlekettik deńgeıde otbasy, januıa uǵymdaryna kórsetiletin zor qurmetti pash etedi jáne oǵan erekshe nazar bólinetinin aıqyndaıdy.
Bıyl osy konkýrstyń jeńimpazdaryn anyqtaý sáti Otbasy kúnine oraılastyrylyp, keshe, ıaǵnı 12 qyrkúıekte ótkizildi. Ulttyq konkýrstyń jeńimpazdaryn marapattaý sharasynda QR Memlekettik hatshysy - QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova QR Prezıdenti Nursultan Nazarbaevtyń barsha Qazaqstan halqyn Otbasy kúnimen quttyqtaýyn oqyp berdi.
«Qymbatty qazaqstandyqtar, qurmetti saltanatty jıynǵa qatysýshylar! Barshańyzdy meniń Jarlyǵyma sáıkes qyrkúıek aıynyń 2-shi jeksenbisinde atalyp ótiletin Otbasy kúnimen shyn júrekten quttyqtaımyn. «Mereıli otbasy» Ulttyq konkýrsynyń máresi osy aıtýly kúnge oraılastyrylǵan. Árbir shańyraqtaǵy bereke túptep kelgende tutas eldiń berekesi. Adamǵa eńbekqorlyq, otansúıgishtik, jasampazdyq pen meıirimdilik sııaqty asyl qasıetter otbasy arqyly darıdy. Meniń bastamammen qolǵa alynǵan «Mereıli otbasy» konkýrsy qysqa merzim ishinde jalpyhalyqtyq baıqaýǵa aınalǵanyn rızashylyqpen atap ótemin. Byltyrǵy jylǵa qaraǵanda bıylǵy jyly baıqaýǵa kóp balaly otbasylar eki ese, jas otbasylar 1,5 ese kóp qatysty. Sondaı-aq konkýrsqa jalpy qatysýshylardyń 80 paıyzǵa jýyǵy aýyl turǵyndary bolyp tabylady. Olardyń arasynda ártúrli mamandyq ıeleri, ata kásibin urpaqtan-urpaqqa mıras etken eńbek áýletteri bar. Barlyǵy da qurmet pen madaqqa laıyq. Búgingi mereıli kúnde árbir qazaqstandyq otbasyna qajyrly eńbek, taǵlymdy tárbıe, izgi dástúrler sabaqtastyǵyn laıyqty jalǵastyryp kele jatqany úshin zor rızashylyǵymdy bildiremin. Berik otbasylyq qundylyqtar arqyly ǵana memlekettiń irgesi myǵym, ǵumyry máńgi bolady. Barshańyzǵa zor densaýlyq, bereke-birlik, jaqsylyq tileımin! Shańyraqtaryńyzǵa mahabbat pen tatýlyq saltanat qursyn!» - delingen QR Prezıdentiniń quttyqtaýynda.
Esterińizge sala keteıik, keshe elordadaǵy «Qazaqstan» ortalyq kontsert zalynda «Mereıli otbasy» Ulttyq konkýrsynyń 2015 jylǵy jeńimpazy anyqtaldy. Bas júldeni mańǵystaýlyq Qulsarıevter otbasy enshiledi. Bul otbasy ınternet daýys berý barysynda 25 myń 751 daýys jınaǵan bolatyn. Qulsarıvter otbasyn QR Memlekettik hatshysy Gúlshara Ábdiqalyqova quttyqtap, olarǵa Qazaqstanda shyǵarylǵan «IVECO» shaǵyn avtobýsynyń kiltin tabys etti.
