Búgin Óskemennen Almatyǵa ushýy tıis ushaq bir táýlikke keshigip jatyr

ASTANA. QazAqparat - Búgin oryndalýy tıis Óskemen - Almaty baǵytyndaǵy FlyArystan áýekompanııasynyń reısi shamamen bir táýlikke keshigedi, dep habarlaıdy QazAqparat tilshisi.

«30 mamyr kúni saǵat 13:15-te oryndalýy tıis KC7172 Óskemen - Almaty reısi óndiristik qajettilikke baılanysty keshiktirildi. Reıs 31 mamyr saǵat 10:00-da ushady dep josparlanyp otyr. Oǵan Óskemen qalasyndaǵy áýejaıdyń túngi ýaqytta jumys istemeýi sebep boldy», - delingen kompanııanyń Telegram arnasynda jarııalanǵan habarlamada.

FlyArystan-nan málimdegendeı, óndiristik olqylyqty joıý úshin eń jaqyn reıspen Óskemenge ınjener maman jiberilmek.

«Bul reıstiń jolaýshylary qonaq úıge ornalastyrylady. Oǵan deıin kólik uıymdastyrylǵan. Sýsyndar men ystyq tamaq sol jerde beriledi», - dep jazylǵan habarlamada.

Aıta keteıik, zań talaby boıynsha reıs 2 saǵattan artyq keshiktirilgen kezde jolaýshylarǵa sýsyndar, 5 mınýttan aspaıtyn 2 telefon qońyraýyn nemese 2 elektrondy poshta habarlamasyn joldaý múmkindigi usynylady.

Al 4 saǵattan artyq keshiktirilgende ystyq tamaq beriledi.

5 saǵattan asa keshiktirgende bir ret tegin áýe bıletiniń ýaqytyn ózgertý múmkindigi usynylady.