Búgin Oraza aıt namazyna «Nur Astana» Ortalyq meshitine 10 myńnan astam adam jınaldy
ASTANA. Qyrkúıektiń 9-y. QazAqparat /Gúlmıra Álıakparova/ - Búgin, barsha musylman qaýymynyń eń qasıetti merekeleriniń biri - Oraza aıt merekesi bastaldy. Astana qalasyndaǵy barlyq meshitterde tańǵy saǵat 7-de merekelik aıt namazy oqyldy.
«Nur Astana» ortalyq meshitiniń naıb ımamy Tólebı Ospannyń aıtýynsha, búgin aıt namazyna qatysqan qaýymnyń sany jyldaǵydan aıtarlyqtaı kóp boldy. Birmezgilde 10 myń adamdy qabyldaýǵa eseptelgen meshittiń ishi de, onyń aldyndaǵy alańqaı da minájat etýshilerge lyq tolǵan.
«Aıt namazy - Oraza aıt kúnderi atqarylatyn sharalardyń eń negizgisi. Óıtkeni, Alla elshisi óz hadısinde: «Múmin pendeler Ramazan aıynyń orazasyn tolyq ustap, aıt kúni namazǵa bet alǵanda, Alla taǵala perishtelerge: «Eı, perishtelerim! Adamzat beınet atqarsa, aqysyn talap etedi. Pendelerim men paryz etken orazany atqaryp, aqysyn alýǵa meshitke bet aldy. Olar Men úshin oraza ustady, Meniń pármenimmen aýyz ashty, endi qýanyshqa kenelsin. Sender kýá bolyńdar, olardy keshirdim», - degen. Sondyqtan búgingi mereke aıt namazy jamaǵatpen oqýmen bastaldy. Budan keıin musylmandar bir-birin aıtpen quttyqtap, qonaqqa barady, marqumdardy eske alyp, duǵa baǵyshtaıdy. Aǵaıyn-týysty aralap, muqtaj jandarǵa járdem beredi. Sol arqyly olardyń da kóńiline merekelik kóńil-kúı syılaıdy», - deıdi ol.
Aıt sózi - «mereke», «meıram» degen uǵymdy bildiredi.
Aıta keteıik, aıt merekesi Ramazan aıynan keıin keletin - Sháýýál aıynda atap ótiledi. Paıǵambarymyz (s.ǵ.s.) óz úmbetterin sháýýál aıynda da oraza tutýǵa úndep, onyń saýabynyń moldyǵyn aıtqan. Ol: «Kimde-kim Ramazandy orazamen ótkizip, budan keıin sháýýál aıynda alty kún oraza ustasa, jyl boıy oraza ustaǵanmen birdeı», - degen. Sháýýál aıynyń orazasyn sol aıdyń ishinde kez-kelgen kúni ustaýǵa bolady. Ony qatarynan úzbeı nemese kúnderin úzip-úzip ustaýǵa bolady. Biraq aıt ótisimen kezekpen tolyqtaı ustaý - abzal.
Qasıetti Ramazan Aıt merekesi qutty bolsyn! Aıt qabyl bolsyn!
