Búgin ólsem barlyq qajet jerge aǵzamdy berer edim - Jaqsylyq Dosqalıev
AQTÓBE. QazAqparat - Elimizdiń bas transplantologi donor bolýǵa daıyn. Bul týraly ol Aqtóbede ótken baspasóz máslıhatynda málimdedi, dep habarlaıdy QazAqparat tilshisi.
Donor bolýdyń mán-jaıyn túsindirgen Ulttyq transplantologııa ortalyǵynyń dırektory Jaqsylyq Dosqalıev donor bolý men odan bas tartý jaıyn aıtyp berdi. Halyq densaýlyǵy jáne densaýlyq saqtaý júıesi kodeksine sáıkes kez kelgen adam meken jaıy boıynsha tirkelgen emhanaǵa baryp, donor bolýǵa ótinish jaza alady. Keıin arnaıy medıtsınalyq tekserýden ótip, donor bolýǵa jaramdy nemese jaramsyz degen qorytyndy shyǵarylady. Eger jaramdy bolsa tirkeýge alynady. Bul túbegeıli sheshim emes. Kez kelgen adam bul oıynan bas tartyp, emhanaǵa baryp, qaıta aryz jazady. Ol kezde adamnyń mıy ólgen jaǵdaıda dárigerler naýqasqa qol tıgize almaıdy. Eger eshqandaı qujat bolmasa, dárigerler týǵan-týystarynyń, tanystarynyń kelisimin kútpeı adamnyń aǵzasyn ala alady.
«Mıdyń óli nemese tiri ekenin anyqtaıtyn arnaıy apparat bar. Mıdyń ólgenin anyqtaıtyn arnaıy ádis bar. Bul jerde jemqorlyqtyń bolýy múmkin emes. Ári sheshimdi bir emes, birneshe dáriger shyǵarady. 24 saǵat boıy naýqasty baqylaımyz, keıin sheshim shyǵarylady. Kez kelgen adam donor bola almaıdy. Ony qarapaıym halyqqa túsindirý kerek. Birneshe tekserý júrgizilip, gıstologııalyq sáıkestigi anyqtalady. Adamnyń aǵzasy kóliktiń qajetti bólshekteri sııaqty emes. Egizderdiń de aǵzalary bir-birine saı kelmeı jatady. Men qujatqa qol qoıdym. Men búgin ólsem de barlyq jerde aǵzamdy beremin. Ózimniń emhanama baryp, sol jerde qujatymdy toltyrdym», - dedi Jaqsylyq Dosqalıev.
Aıta keteıik, Aqtóbedegi ruqsatsyz búırek aýystyrý oqıǵasynan soń oblystyq densaýlyq saqtaý basqarmasy jergilikti emhanalarda túsindirý jumystaryn júrgizýge ýáde berdi. Buǵan deıin habarlaǵanymyzdaı, Ulttyq transplantologııa ortalyǵynyń dırektory Jaqsylyq Dosqalıev Aqtóbege kelip, Serikbolsyn Kósherbaıdyń otbasyna kóńil aıtýǵa ýáde etti.
