Búgin musylman jurtshylyǵy Máýlit merekesin atap ótedi

Paıǵambar jáne Elshi retinde jiberilgen, Paıǵambarlardyń eń sońǵysy jáne eń ústemi Muhammed (s.ǵ.s) 571 jyly sáýirdiń 20-na týra keletin rabıýláýýál aıynyń 12-si dúısenbiniń túninde tańǵa jýyq Mekkede dúnıege keldi. Mine, osy kún «Máýlit» merekesi bolyp sanalady.

Búgin de álem musylmandarynyń halyqtyq merekesine aınalǵan, qýanysh pen shattyq kúni bolǵan, «máýlit merekesi» san ǵasyrdan beri jyl saıyn toılanyp keledi. «Máýlit» - týylǵan sát degendi bildiredi. Máýlit merekesiniń eń mańyzdy bóligi Paıǵambarymyzǵa (s.ǵ.s.) salaýat aıtý.

Paıǵambarymyz máýlit túninde sahabalarǵa taǵam usynyp, bala kezinde bolǵan oqıǵalardy aıtatyn bolǵan. Sondyqtan da, bul mereke Alla Rasýly týylǵan kezde álemde bolǵan qubylystar men teńdessiz muǵjızalardy aıtý, tyńdaý, úırený jáne adamdarǵa úıretý óte saýapty amaldardan sanalady. Máýlit túni qadir túninen keıingi eń qadirli túnderdiń biri. Bul túni Paıǵambarymyzdyń týylǵanyna qýanǵandar keshiriledi.

Qazirgi tańda bul merekeni bir-eki memleketten basqa barlyq ıslam elderi erekshe iltıpatpen atap ótedi. Bul túni sazdy aspaptar jáne haram nárselerdi aralastyrmaı, erkek-áıel aralaspaı, Allah rızalyǵy úshin máýlit jıyndaryn uıymdastyrý, máýlit oqý, salaýat aıtý, halyqqa dámdi taǵamdar usyný, jaqsylyqtar jasaý mústahab bolady. Bul kúni Quran kárim oqý, qaza namazdardy oqý, sadaqa berý, duǵa oqý jáne Haq taǵaladan kúnálarymyzdyń keshirilýin tileý kerek.