Búgin Mustafa Óztúriktiń týǵanyna 59 jyl toldy
ALMATY. 23 qarasha. QazAqparat - Búgin QR Taekvondo (WTF) federatsııasynyń negizin salýshy, halyqaralyq dárejedegi jattyqtyrýshy Mustafa Kábenuly Ábdirahman kózi tiri bolǵanda 59 jasqa tolar edi. Mustafa Óztúrik degen atpen álemge áıgili bolǵan sport sańlaǵy 1954 jyly Túrkııanyń Qaıseri qalasyndaǵy Musahodjaly aýylynda dúnıege kelip, 40 jasynda 1995 jyly 15 naýryzda Almatyda kóz jumǵan bolatyn.
«Mustafa Óztúrik ultyn qatty madaqtaǵan adam edi. Júrgen jerinde óziniń «Qazaqtyǵyn!» maqtanyshpen aıtyp júretin. Mustafa baýyrymyzdyń ónegeli isteri tárbıe isinde úlgi tutýǵa taptyrmaıtyn obraz. Biz ony áli kúnge deıin tek sportshy dep qana tanyp kele jatyrmyz», - deıdi Mustafanyń shákirti Atyraýda taekvonda sportynyń damýyna zor úlesin qosqan, QR Eńbek sińirgen jattyqtyrýshysy Qabıbek Muhıtov. Qazirgi tańda Halel Dosmýhamedov atyndaǵy Atyraý memlekettik ýnıversıtetiniń aǵa oqytýshysy bolyp qyzmet etetin tarıh ǵylymdary kandıdatynyń aıtýynsha, Mustafa Óztúrik jastyq shaǵynda óleń de jazǵan eken. Keıin kınoǵa túsip, 6 kınoda oınaǵan. Ókinishke oraı, onyń bul qyrlary zertteýshiler tarapynan áli ashylmaı jatyr. Kelesi jyly onyń týǵanyna 60 jyl tolady eken. Bul sharany laıyqty deńgeıde atap ótý arqyly, asyl azamattyń ónegeli isin jas urpaqqa úlgi tutýǵa quzyrly organdar kóńil bólse nur ústine nur bolar edi.
